له پېښو سره د مبارزې آمادګۍ ملي ادارې سرپرست په جوزجان ولایت کې د یو جوړ شوي ګبیوني دیوال د کیفیت څارنه وکړه
نن ورځ د پنجشنبې په سهار، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، چې د اداري چارو او خلکو ته د خدماتو د وړاندې کولو د بهیر د ښه والي په موخه یې ولایتي سفرونه پیل کړي، د جوزجان ولایت په فیض آباد ولسوالۍ کې د یادې ادارې لخوا جوړ شوي د یو ګبیوني دیوال د کار د کیفیت څارنه وکړه.
محترم ترابي صاحب د دغه دېوال د څارنې پر مهال وویل چې د وقایوي پروژو پلي کول د طبیعي پېښو د خطرونو د کمولو په برخه کې ډېر مهم او اغېزناک دی، او زیاته یې کړه چې وقایه تل له درملنې غوره ده، ځکه چې موږ کولای شو د یو میلیون افغانیو په لګښت سره یوه وقایوي پروژه پلي کړو او له دې لارې د پېښو له امله د لسګونو میلیونو افغانیو د پېښو احتمالي زیانونو څخه مخنیوی وکړو.
یاد دیوال د سیند د شکن د تحکیماتي پروژې تر نامه لاندې د فیض آباد ولسوالۍ په کوکلداش کلي کې د ۱۷ متره اوږدوالي په غرقه، په څنګونو کې ۴۰ متره، د ۸ متره په لوړوالي او د ۴۸۰ متره مکعب په مجموعي حجم سره جوړ شوی دی. دا ګبیوني تحکیمات د ډبرو سره یوځای شوي، چې د پلي کولو په پایله کې یې ۳۰۰ هستوګنیز کورونه او زرګونه جریبه کرنیزه ځمکه د سیلابونو له خطر څخه خوندي پاتې شوي.
د یادونې وړ ده، چې د سیمې اوسېدونکو د ترابي صاحب او له پېښو سره د مبارزې آمادګۍ ملي ادارې څخه مننه او قدرداني وکړه او د دې پروژې پلي کول یې حیاتي وباله او غوښتنه یې وکړه چې دا ډول نورې وقایوي پروژې دې هم طرحه او پلي شي.
نېټه: ۱۴۴۶/۱۲/۲۲ هـ ق
له پېښو سره د مبارزې آمادګۍ ملي اداره
