له پېښو سره د مبارزې آمادګۍ ملي ادارې او د ژغورنې نړویوالې کمېټې (IRC) ترمنځ د شپږ سوه او پنځوس زره (۶۵۰,۰۰۰) ډالرو په ارزښت د ګډو همکاریو تفاهم نامه لاسلیک شوه

نن ورځ سه شنبه، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د ژغورنې نړیوالې کمېټې (IRC) له رئیسې میرمن لیزا مارګاریت اوون او مل پلاوي سره په خپل کاري دفتر کې وکتل او ور سره یې د ګډو همکاریو تفاهم‌نامه لاسلیک کړه.

په پيل کې، محترم ترابي صاحب، راغلي پلاوي ته ښه راغلاست وویل، او زیاته یې کړه، لکه څرنګه چې ستاسو د پلي کېدونکې پروژې یوه برخه د ژمي له موسم سره تړاو لري نو له همدې امله خپله پروژه د ژمي موسم له پای ته رسېدو مخکې او په شفاف ډول ترسره کړئ، همدارنګه ترابي صاحب راغلي پلاوي ته وویل، چې دې ادارې د مرسته کوونکو بنسټونو لپاره د هغوی د پروژو د پلي کولو په موخه د پام وړ آسانتیاوې رامنځته کړې دې،  

ورپسې، لیزا مارګاریت اوون د دې ادارې له لوی رئیس څخه د وخت ورکولو او همیشنیو همکارو له امله مننه وکړه او د هغه  ملاتړ یې د ځان لپاره ارزښت مند وباله، همدارنګه نوموړې د خپلې پلي کېدونکې پروژې په اړه هراړخیز معلومات وړاندې کړل او د هغې د ژر او شفاف پلي کېدو په اړه یې ډاډ ورکړ. 

په پای کې، د دواړو لوریو ترمنځ ټولټال د شپږ سوه او پنځوس زره (۶۵۰،۰۰۰) ډالرو په ارزښت د ګډو همکاریو تفاهم نامه لاسلیک شوه ، چې له مخې به یې یاده کمېټه د کنړ ولایت په څوکۍ او نورګل ولسوالیو کې ۱۴۱۵ مستحقو کورنیو هرې کورنۍ ته د خوراکي توکو بستې چې په کې ۱۷۸ کیلو اوړه، ۴۲ کیلو وریجې، ۱۴ ليټره غوړي، ۱۸ کیلو لوبیا، ۲ کیلو مالګه، ۱۴۱۵ مستحقو کورنیو هرې یوې ته درې تختې کمپلې، ۱۴۱۵ کورنیو ته د ښځینه   روغتیایي بستې، چې پکې بېلابېل د روغتیا ساتنې توکي شتون لري او ۱۶۶۵ مستحقو کورنیو هرې یوې ته ژمنۍ البسې، چې په کې جاکټ، بوټ، خولۍ، شال او دستکش شتون لري ووېشل شي او همدارنګه د یاد هوکړه لیک له مخې به په یادو ولسوالیو کې د ټولنې خلکو ته د طبیعي پېښو د خطرونو په هکله د عامه پوهاوي د ورکولو پروګرامونه ترسره شي. 

نېټه: ۱۴۴۷/۸/۲۲ هـ ق 

له پېښو سره د مبارزې آمادګۍ ملي اداره