له پېښو سره د مبارزې آمادګۍ ملي ادارې او د پیاوړتیا لوړولو چاپيریال ساتنې او بشري مرستو موسسې ترمنځ د ۴۰،۵۶۳ ډالرو په ارزښت د ګډو همکاریو تفاهمنامه لاسلیک شوه
نن د دوشنبې په ورځ له غرمې وروسته، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د REHA موسسې له اجرائیوي رئیس، محترم محمد یوسف حمیدیان سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې، محترم ترابي صاحب د یادې موسسې پلاوي ته ښه راغلاست وویل او نوموړي زیاته کړه، چې موږ د مؤسسو لپاره د پام وړ آسانتیاوې رامنځته کړې دې ترڅو خپلې تطبیقېدونکې پروژې بېغیر له کومې ستونزې ترسره کړي او له مؤسسو څخه مو دا غوښتنه ده چې خپلې پروژې په چټک او شفاف ډول سره تطبیق کړي.
ورپسې، د رها موسسې اجرائیه رئیس، محترم محمد یوسف حمیدیان، د خپلې پروژې په اړه معلومات وړاندې کړل او له پېښو سره د مبارزې آمادګۍ ملي ادارې د چارو په ځانګړي ډول له موسسو سره د تفاهم نامو د لاسلیک کولو په برخه کې د چټکتیا له شتون څخه ستاینه وکړه او زیاته یې کړه چې موږ به خپله پروژه د دې ادارې د مسؤلینو سره په همغږۍ ترسره کړو.
د یادونې وړ ده، چې د ناستې په پای کې د دواړو لوریو ترمنځ ټولټال د څلوېښت زره او پنځه سوه او دري شپېته (۴۰،۵۶۳) ډالرو په ارزښت د ګډو همکاریو تفاهمنامه لاسلیک شوه، چې د دې تفاهمنامې له مخې، به د میدان وردګ ولایت د نرخ ولسوالۍ په صد برګ او تاتار کلیو کې ۶۰ کورنیو هرې یوې ته د زراعتي توکو او نورو وسایلو لکه ۱۰۰ امپیره بټرۍ، یوه تخته ۳۰۰ واټه سولر، ۱ عدد ۱۲ ولټه چارج کنټرولر، ۱ عدد لرګین نغری، ۱ عدد د میوو او د سبزیجاتو د وچوونکي ماشین بستې وېشل او د اقلیم د بدلون له امله د رامنځته کېدونکو پېښو په اړه د ټولنې وګړو ته یو ځلې ښوونیزه برنامه ترسره کول او همدارنګه له بازار څخه تر اړوند کورنیو پورې د یادو توکو رسول او تخلیه کول.
نېټه: ۱۴۴۷/۱/۱۸ هـ ق
له پېښو سره د مبارزې آمادګۍ ملي اداره
