له پېښو سره د مبارزې آمادګۍ ملي ادارې او د هستوګنې لپاره د آغا خان دفتر ترمنځ د ګډو فعالیتونو د بهیر د آسانتیا لپاره تخنیکي غونډه ترسره شوه
نن ورځ پنجشنبه، د غرمې پر مهال، له پېښو سره د مبارزې آمادګۍ ملي ادارې او د هستوګنې لپاره د آغا خان د دفتر د استازو ترمنځ د پېښو د مدیریت لکه، په بېړنیو حالاتو کې رسېدنه، وقایوي پروژې، پوهاوي ورکولو او د نورو تخنیکي مسایلو په برخو کې د همکارۍ او همغږۍ په موخه تخنیکي غونډه ترسره شوه.
په دې ناسته کې، د اطلاعاتو او نشراتو رئیس، حافظ محمد یوسف حماد، د بهرنیو اړیکو مسؤل، برهانالدین خان، د هستوګنې لپاره د آغا خان د دفتر لوی رئیس، راحتالله بیک، د بېړنیو حالاتو مسؤول، سید احمد سهیم، د پروګرام مسؤول، ابرار حسین او همداراز د دې ادارو او یادې موسسې یو شمېر آمرینو ګډون کړی و.
د ناستې اصلي تمرکز څېړنه، استراتیژي، د بېړنیو فعالیتونو د بهیر چټکتیا او آسانتیا، وقایوي پروژې، دوه اړخیز ژمنتیاوې، دGIS سیستم، د معلوماتو تبادله، او د دوامداره همکاریو پراخول وو.
له پېښو سره د مبارزې آمادګۍ ملي ادارې استازو د خپلو فعالیتونو او اوسنیو ننګونو په اړه معلومات وړاندې کړل او له نړیوالو شریکانو سره یې د نږدې همکارۍ او همغږۍ پر اړتیا ټینګار وکړ.
همداراز، د هستوګنې لپاره د آغا خان د دفتر مسؤولینو، د بشري مرستو د خدماتو په وړاندې کولو، د طبیعي پېښو له امله زیانمنو کورنیو ته د مرستو د رسولو د بهیر پر چټکتیا، وقایوي پروژو، د ظرفیت لوړولو او په نورو برخو کې د یادې موسسې د اغېزمنې همکارۍ پر ژمنتیا ټینګار وکړ.
په دې ناسته کې، د سیلابونو کارپوه، سید کریمالله دانش، له پېښو سره د مبارزې آمادګۍ ملي ادارې د فعالیتونو اړوند یو مفصل پریزنټېشن وړاندې کړ، او د هستوګنې لپاره د آغا خان دفتر د انجنیري برخې مسؤول، انجنیر حارث حیدري لخوا د هستوګنې د پروژو په اړه پریزنټېشن وړاندې شو.
د غونډې په پای کې، دواړو لوریو د ګډو همکاریو پر دوام، د پروګرامونو په پلي کولو کې د همغږۍ د ښه والي، او د معلوماتو د اغېزمنې تبادلې پر اهمیت ټینګار وکړ.
نېټه: ۱۴۴۶/۱۱/۱۷ هــ ق
له پېښو سره د مبارزې آمادګۍ ملي اداره
