له پېښو سره د مبارزې آمادګۍ ملي ادارې او د افغان ځوانانو د خدماتي مؤسیسې تر منځ د څلور سوه، څلور اتیا زره او اوه سوه او اوه (۴۸۴،۷۰۷) ډالرو په ارزښت د ګډو همکاریو تفاهم نامه لاسلیک شوه

نن ورځ له غرمې مخکې، له پیښو سره د مبارزې آمادګۍ ملي ادارې سرپرست، محترم الحاج ملا نورالدین ترابي د افغان ځوانانو د خدماتي مؤسیسې له اجرائیوي رئیس انجنیر عبدالحبیب تحریک سره په خپل کاري دفتر کي وکتل او د ګډو همکاریو تفاهم نامه یې ورسره لاسلیک کړه. 
په پیل کې، محترم ترابي صاحب د AYSO  مؤسیسې راغلي پلاوي ته ښه راغلاست وویل او زیاته یی کړه چي مؤسیسات باید په خپلو کارو کي له پوره شفافیت او سرعت څخه کار واخلي ترڅو زیانمنو شو کورنیو ته پر وخت مرستي ورسېږي، همداریګه ترابي صاحب وویل، چې په ولایتونو کې زموږ کارکوونکي له مؤسساتو سره په سروې، توزېع او نورو برخو کې پوره همکارۍ کولو ته چمتو دي. 
ورپسې د یادي مؤسیسې اجرائیه رئیس محترم انجنیر عبدالحبیب تحریک د خپلو مخکینیو او اوسني پروژې په هکله معلومات وړاندې کړل او زیاته یې کړه چې موږ به خپل کارونه په پوره شفافیت، سرعت او د ستاسو د ولایتي مسؤلینو سره په پوره همغږۍ سره ترسره کوو.
په پای کي د دواړو لوریو ترمنځ د څلور سوه او څلور اتیازره او اوه سوه او اوه (۴۸۴.۷۰۷) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د بادغیس ولایت په جوند، قادس او قلعه نو ولسوالیو کې ۲،۴۳۰ مستحقو کورنیو ته د څلورو میاشتو لپاره د خوراکي توکو بستې ووېشل شي، جې په یادو بستو کې به ۵۰ کیلو اوړه، ۴ لیټره غوړي، ۴ کیلو دال او نیمه کیلو مالګه شتون لري. 

نیټه: ۱۴۴۷/۰۲/۰۵ هـ ق 
له پېښو سره د مبارزې آمادګۍ ملي اداره