د کندهار ولایت له پېښو سره د مبارزې آمادګۍ ریاست په ارغستان ولسوالۍ کې د اوبو د چکډیم پاکولو له کار څخه څارنه وکړه
د کندهار ولایت له پېښو سره د مبارزې آمادګۍ ریاست د ارغستان ولسوالۍ د شین څاه تنګي په سیمه کې د اوبو د چکډیم پاکولو له روانو چارو څخه تخنیکي څارنه وکړه او د پروژې د پلي کېدو بهیر، کیفیت او پرمختګ یې وارزاوه.
دا پروژه له پېښو سره د مبارزې آمادګۍ ادارې له لوري د ۱۴۰۰ لیټره تېلو په برابرولو او د سیمې د خلکو په همکارۍ د ۱۴۰۰ لیټره نورو تېلو په چمتو کولو پلې کېږي. همدارنګه، د پروژې د پلي کولو لپاره اړین ماشین د کورنیو چارو وزارت له لوري برابر شوی، چې د پاکولو کار یې چټک کړی دی.
د دغې پروژې په بشپړېدو سره به د ارغستان ولسوالۍ د څلورو کلیو شاوخوا ۱۰۰ کورنۍ، ۴ جوماتونه او نږدې ۳۰۰ باوړۍ د پروژې له ګټو څخه په مستقیم ډول برخه من شي. همدارنګه به د اوبو د مدیریت ښه والی، د سیلابونو د خطر کمښت، د کرنیزو ځمکو ساتنه او د اوبو د زېرمه کولو ظرفیت لوړ شي. چې د سیمې پر کرنه او د خلکو پر اقتصادي وضعیت به مثبت اغېز ولري.
د کندهار ولایت له پېښو سره د مبارزې آمادګۍ ریاست ټینګار وکړ چې د اړوندو ادارو، همکارو بنسټونو او ځایي خلکو په ګډې همکارۍ به د قدرتي پېښو د خطرونو کمولو په موخه د ورته وقایوي پروژو پلي کول دوام ومومي.
