د ننګرهار ولایت له پېښو سره د مبارزې آمادګۍ ریاست د مهمندرې ولسوالۍ په یو شمېر سیمو کې د ټولنې په کچه د ژغورنې کېټونه ووېشل

له پېښو سره د مبارزې آمادګۍ ادارې او د SCI مؤسسې ترمنځ د لاسلیک شوي هوکړه لیک له مخې، ننګرهار ولایت له پېښو سره د مبارزې آمادګۍ ریاست د یادې مؤسسې په همکارۍ، د مهمندرې ولسوالۍ د ګردي غوث، بیلې او هزارنو سیمو کې د ټولنې په کچه د بیړنیو پېښو پر مهال د چټکې ځواب وینې او د ژغورنې د ظرفیت د لوړولو په موخه د ژغورنې کېټونه ووېشل.

په دې بهیر کې، د مسؤلینو په شتون کې د ژغورنې او بیړنیو حالاتو د مدیریت لپاره د اړینو تجهیزاتو کېټونه چې، خېمې، ترپالونه، کمپلې، سفري کمپلې، د اوبو بوشکې، سولري څراغونه، بیړنۍ راډیوګانې (VHF)، د اور وژنې وسایل، بیلچې، کلنګونه، زینې، لاسي او د سر څراغونه، حفاظتي خولۍ، کاري واسکټونه، ربړي او چرمي دستکشې، ربړي موزې، د لومړنیو مرستو بکسونه (First Aid Kit)، د اوبو کولرونه او نور اړین توکي په کې شامل دي، ووېشل شول.

د دغو تجهیزاتو د وېش موخه، په سیمه کې د رضاکارانو او ټولنیزو ژغورنې ټیمونو پیاوړتیا، د قدرتي پېښو پر مهال د چټکې ځواب وینې وړتیا لوړول او د خلکو د ژوند او شتمنیو د خوندیتوب لپاره د لازم چمتووالي نیول دی.

د سیمې اوسېدونکو د دغو ژغورنیزو تجهیزاتو له برابرولو خوښي څرګنده کړه او د ننګرهار ولایت له پېښو سره د مبارزې آمادګۍ ریاست او SCI مؤسسې څخه یې مننه او قدرداني وکړه.