د لغمان ولایت له پېښو سره د مبارزې آمادګۍ ریاست ۶۰ مستحقو کورنیو ته نغدي او غیر خوراکي مرستې ووېشلې

له پېښو سره د مبارزې آمادګۍ ملي ادارې او د PU-MAI مؤسسې ترمنځ د لاسلیک شوي هوکړه لیک له مخې، د لغمان ولایت له پېښو سره د مبارزې آمادګۍ ریاست د یادې مؤسسې او د کډوالو نړیوال سازمان IOM په ملاتړ، د دې ولایت اړوند ۶۰ مستحقو کورنیو ته له سروې وروسته نغدي او غیر خوراکي مرستې ووېشلې. 

په دې لړۍ کې هرې کورنۍ ته د IOM سازمان له لوري ۸،۵۵۰ افغانۍ نغدي پيسې او ۲۴ هغو کورنیو ته چې د طبیعي پېښو له امله یې کورونه په بشپړ ډول زیانمن شوي وو، هرې کورنۍ ته په یادو نغدي مرستو سربېره یوه خېمه هم ووېشل شوه، ټولټال د یاد شمېر کورنیو لپاره پنځه سوه او دیارلس زره (۵۱۳،۰۰۰) افغانۍ نغدي پیسې ځانګړې شوې وې او همدارنګه د PU-MAI  مؤسسې لخوا مستحقو کورنیو ته روغتیایي کېټونه ووېشل شول. 

د یادونې وړ ده، چې په پای کې د مرستو ترلاسه کوونکو کورنيو د یاد ولایت له پېښو سره د مبارزې آمادګۍ ریاست او همکارو مؤسسو څخه د مننې ترڅنګ وويل، چې يادې ادارې تل هڅه کړې، څو له مستحقو کورنيو سره پر وخت مرسته او لاسنيوی يي وکړي.

نېټه: ۱۴۴۷/۷/۲۸ هـ ق

له پېښو سره د مبارزې آمادګۍ ملي اداره