د اسلامي همکاریو سازمان؛ د بدخشان ۵۰۰ زلزله ځپلو او د طبیعي پېښو زیانمنو کورنیو سره خوراکي مرستې ترسره کوي
کابل- د کب ۱۸مه-۱۴۰۱
محترم مولوي شمس الدین حقیار پېښو ته د رسېدو په چارو کې د دولت وزارت د نړیوالو اړیکو رییس، د محترم محمد سعید آل عیاش په افغانستان کې د اسلامي همکاریو سازمان (OIC) سفیر او ډاکټر توفیق احمد د دغه سازمان د بشري مرستو د مسوول سره د محترم شفیع الله رحیمي د یاد وزارت د اطلاعاتو او عامه اړیکو رییس او ویاند او محمد منصور امیری د بېړنیو حالاتو د عملیاتو مرکز ریاست سرپرست په شتون کې د بدخشان زلزله ځپلو لپاره د خوراکي مرستو په اړه خبرې وکړې.
په دې غونډه کې ښاغلي آل عیاش په افغانستان کې د اسلامي همکاریو سازمان (OIC) رییس د خپلو کړنو په اړه د معلوماتو په وړاندې کولو سره ووېل: دغه سازمان په پام کې لري ترڅو د پېښو له امله ټولو زیانمنو ته مرستې ووېشي او همدارنګه د پېښو مدیریت په برخه کې یې د اړینو وسایلو او اړتیاوو په هکله ژمنه وکړه.
ورته مهال د دغه وزارت د نړیوالو اړیکو رییس د اسلامي همکاریو سازمان د همکاریو څخه د مننې او ستاینې ترڅنګ د بشري مرستو د دوام او د پېښو مدیریت لپاره د تجهیزاتو د پېرېدلو غوښتنه وکړه.
د یادونې وړ ده چې دغه مرستې د ۵۰۰ زلزله ځپلو لپاره د تړون لیک له لارې ترسره کېږي.
