له پېښو سره د مبارزې آمادګۍ ملي ادارې لوی رئیس د کونړ ولایت له پېښو سره د مبارزې آمادګۍ ریاست د اداري ودانۍ لپاره ځانګړې شوې ځمکه وکتله
نن سهار د یکشنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، کونړ ولایت ته د سفر پر مهال له هغې ځمکې څخه لیدنه وکړه، چې د یاد ولایت له پېښو سره د مبارزې آمادګۍ ریاست د اداري ودانۍ د جوړېدو لپاره ځانګړې شوې ده.
محترم ترابي صاحب د دې ځمکې د کتنې پر مهال وویل، چې د اداري ودانۍ جوړېدل خلکو ته د خدمت رسونې په بهیر کې ګټور تمامېږي او د کارکوونکو لپاره به زیاتې اسانتیاوې رامنځته کړي. نوموړي زیاته کړه چې د اداري د ودانیو د جوړولو چارې په پنځو ولایتونو کاپیسا، میدان وردګ، کندهار، سمنګان او خوست کې په عملي ډول پر مخ روانې دي.
له پېښو سره د مبارزې آمادګۍ ملي ادارې لوی رئیس ټینګار وکړ چې اداري ودانۍ باید ښار ته نږدې او په داسې ځای کې جوړه شي چې خلک په اسانۍ سره لاسرسی ورته ولري.
نېټه: ۱۴۴۷/۳/۲۱ هـ ق
د پېښو سره د مبارزې د آمادګۍ ملي اداره
