له پېښو سره د مبارزې آمادګۍ ملي ادارې لوی رئیس د کابل ولایت په دهسبز ولسوالۍ کې د وروستیو بارانونو او سېلابونو له امله د ۱۲۶۹ زیانمنو شویو کورنیو لپاره د خوراکي او غیر خوراکي توکو د وېش بهیر پیل کړ
نن د چهارشنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د کابل ولایت دهسبز ولسوالۍ ته ولاړ او د وروستیو بارانونو، ږلۍ او سېلابونو له امله د ۱۲۶۹ زیانمنو شویو کورنیو لپاره یې د خوراکي او غیرخوراکي توکو د وېش بهیر پیل کړ.
محترم ترابي صاحب له زیانمنو خلکو سره د خواخوږۍ ترڅنګ وویل، چې زموږ هڅه دا ده چې د وقایوي پروژو د پلي کولو له لارې د هېواد په کچه د پېښو له امله د زیانمنتیا کچه راکمه کړو. د همدې موخې لپاره، دا مهال د دهسبز ولسوالۍ په ګډون، د کابل په ټولو ولسوالیو او همدارنګه د هېواد په ۳۴ ولایتونو کې وقایوي پروژې یا خو پلي شوې دي او یا د پلي کېدو په حال کې دي. نوموړي زیاته کړه چې دا لړۍ به د اسلامي امارت او همکارو مؤسسو له امکاناتو څخه په ګټې اخیستنې سره دوام ومومي.
د ادارې لوی رئیس همدارنګه وویل، چې د دې ډول مرستو لړۍ به په راتلونکې کې هم دوام ولري، او که چیرې خلک پېښو ته د رسېدنې په برخه کې له کومې ستونزې سره مخ شي، کولای شي د کابل ولایت له پېښو سره د مبارزې آمادګۍ ریاست ته د مرستې لپاره مراجعه وکړي.
د یادونې وړ ده، چې په دې مرستو کې هرې کورنۍ ته ۵۰ کیلو اوړه، ۲۵ کیلو وریجې، یوه تخته کمپله، څلور کلچې صابون او ۳۰ پاکټه د اوبو د تصفیې ټابلیټونه ووېشل شول.
په همدې مهال، د دغو مرستو ترلاسه کوونکو د محترم الحاج ملا نورالدین ترابي له شتون او خواخوږۍ څخه د زړه له کومې مننه وکړه، د دغو مرستو له وړاندې کولو څخه یې خوښي وښوده او د اسلامي امارت مسؤلینو ته یې د خیر دعا وکړه.
نېټه: ۱۴۴۷/۴/۲۹ هـ ق
له پېښو سره د مبارزې آمادګۍ ملي اداره
