له پېښو سره د مبارزې آمادګۍ ملي ادارې لوی رئیس د کابل–جلالاباد لویې لارې ته د ښویېدو په حال کې د غره د یوې برخې د وضعیت د ارزونې په موخه سفر وکړ
نن ورځ د یکشنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، په داسې حال کې چې د ننګرهار والي، محترم الحاج ملا ګل محمد (حاجي کاکا)، د لغمان د ولایت مرستیال، محترم مفتي محمد یوسف جمالزی، د لغمان ولایت له پېښو سره د مبارزې آمادګۍ رئیس، محترم قاري خیرمحمد غازي، د ننګرهار ولایت له پېښو سره د مبارزې آمادګۍ رئیس، محترم قاري داد محمد حسيني، د اطلاعاتو او نشراتو رئیس، محترم حافظ محمد یوسف حماد، د ماین پاکۍ چارو د انسجام او همغږۍ رئیس، محترم قاري نورالدین رستمخیل، د ادارې انجنیرانو او د هستوګنې لپاره د آغاخان بنسټ تخنیکي مسوولینو ، د CWSA مؤسسې استازو او د نورو مختلفو ادارو رئیسانو شتون درلود د لغمان ولایت د قرغهیي ولسوالۍ په دیم کاسي سیمه کې د ښویېدو په حال کې د غره له سیمې څخه لیدنه او ارزونه وکړه.
محترم ترابي صاحب له مسؤلینو سره په غونډه کې وویل، چې موږ زیانمنو کسانو ته د رسېدنې ترڅنګ د وقایوي پروژو پلي کولو ته لومړیتوب ورکړی، ځکه چې دا د خلکو د ځان او مال د ژغورنې تر ټولو اغېزناکه او اقتصادي لاره ده.
د یادې سیمې له ارزونې وروسته د ادارې لوی رئیس، د ننګرهار والي او اړوندو مسوولینو سره د سلا مشورو پر مهال وویل چې د غره دغه برخه د مسافرو ژوند له جدي ګواښ سره مخ کوي او باید د دې برخې د وېجاړولو چارې په بیړني ډول پيل شي. نوموړي مسؤلینو ته لارښوونه وکړه چې د لارې د ډېر تګ راتګ له امله باید د غره د ویجاړولو کار په چټک او منظم ډول پرمخ یووړل شي، څو د مسافرو لپاره ستونزې رامنځته نه شي.
د یادونې وړ ده، چې د غره د یادې برخې د ویجاړولو کار به د سه شنبی په ورځ په بشپړ خوندیتوب سره عملاً پیل شي.
نېټه:۱۴۴۷/۶/۱۶ هـ ق
له پېښو سره د مبارزې آمادګۍ ملي اداره
