له پېښو سره د مبارزې آمادګۍ ملي ادارې سرپرست په کابل کې د ۵۰۰ کورنیو لپاره د خوراکي مرستو د وېش لړۍ پیل کړه
له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، نن سه شنبه سهار، په کابل کې د بیلابیلو پېښو له امله د ۵۰۰ زیانمنو کورنیو لپاره د خوراکي مرستو د وېش لړۍ د دې ادارې د اطلاعاتو او عامه اړیکو رئیس محترم ملا جانان سایق، د بېړنیو عملیاتو رئیس محترم قاري خوشحال زماني او د رسنیو په شتون کې پیل کړه.
محترم ترابي صاحب د دې پروسې د پرانیستلو پر مهال د مرستو په وېش کې د شفافیت د شتون یادونه وکړه او ویې ویل چې زموږ ټیمونو د سروې او د زیانمنو او مستحقو کورنیو له ثبت وروسته، نن په کابل کې ۵۰۰ کورنیو ته د مرستې زمینه برابره کړې ده.
د ادارې سرپرست همدارنګه څرګنده کړه چې دا لړۍ په تېرو ورځو کې هم پلي شوې ده او په راتلونکو ورځو کې به هم دوام وکړي. نوموړي وویل چې نن هرې کورنۍ ته یوه بورۍ اوړه او یوه بورۍ وریجې وېشل کېږي او دا مرستې له بیلابیلو هېوادونو لکه ازبکستان، ترکمنستان ، قزقستان، چین او نورو هیوادنو څخه دې ادارې ته بلا عوضه ورکړل شوې دي.
په همدې حال کې، د دغو مرستو ترلاسه کوونکو له پېښو سره د مبارزې آمادګۍ ملي ادارې څخه مننه وکړه او د راتلونکي ژمي ته په کتو یې د نورو مرستو غوښتنه وکړه.
نیټه: ۱۴۴۶/۵/۳
له پیښو سره د مبارزې آمادګۍ ملي اداره
