له پېښو سره د مبارزې آمادګۍ ملي ادارې سرپرست په کابل ولایت کې د ۴۲۳ زیانمنو او راستانه شویو کورنیو لپاره د نغدي او غیرخوراکي مرستو د وېش لړۍ پیل کړه
نن د چهار شنبې سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي په داسې حال کې چې د کابل مرستیال والي ملا محمد یونس مخلص، د کابل ولایت له پېښو سره د مبارزې آمادګۍ رئیس مولوي نجیبالله انوري او خبریالانو هم شتون درلود، د کډوالۍ نړیوال سازمان لخوا د ۴۲۳ زیانمنو، راستانه شویو او اړمنو کورنیو لپاره د نغدي او غیر خوراکي مرستو د وېش لړۍ په کابل کې پیل کړه.
ترابي صاحب د دغو مرستو د پرانیستې پر مهال وویل چې له پېښو سره د مبارزې آمادګۍ ملي ادارې او د کډوالۍ نړیوال سازمان ترمنځ د تفاهمنامې له مخې، نن ورځ د دغه سازمان له لوري د کابل ولایت په بېلابېلو ناحیو او ولسوالیو کي اړوند ۴۲۳ زیانمنو کورنیو ته نغدي او غیرخوراکي مرستې ورکړلی ، چې هرې کورنۍ ته ۱۷۲۰۰ افغانۍ نغدي پیسې او د ۱۶ قلمه توکي لرونکی یو ژمنۍ کېټ وویشل سو .
نوموړي زیاته کړه چې د دې ادارې او یاد سازمان ترمنځ د ۳.۵ میلیونه ډالرو په ارزښت د تفاهم نامې له مخې، ټاکل شوې ده چې د ژمنیو مرستو د وېش لړۍ به د جنورۍ میاشتې تر پایه په ټولو ولایتونو کې بشپړه شي.
د ادارې سرپرست ترابي صاحب د IOM سازمان څخه د مننې تر څنګ له نورو نړیوالو سازمانونو څخه هم غوښتنه وکړه چې د سیاسي موضوعاتو د په پام کې نیولو پرته خپلې بشردوستانه مرستې دوامداره او لا ډېرې کړي.
په همدې حال کې د کابل مرستیال والي ملا محمد یونس مخلص له دې سازمان څخه د مننې ترڅنګ وویل چې د افغانستان اسلامي امارت هڅه کوي چې د افغانستان ولس ته لا زیاتې مرستې برابرې کړي.
د یادونې وړ ده چې د دغو مرستو ترلاسه کوونکو د دې ادارې له هڅو خوښي او مننه څرګنده کړه چې د اړمنو خلکو د خدمت لپاره هڅې کوي.
نېټه:۱۴۴۶/۵/۱۸ هــ ق
له پېښو سره د مبارزې آمادګۍ ملي اداره
