له پېښو سره د مبارزې آمادګۍ ملي ادارې سرپرست په روسیه کې مېشت د افغان سوداګر له لوري ۵۵ ټنه مرسته شوي خوراکي توکي ترلاسه کړل

نن د شنبې په ورځ له غرمې وروسته, له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د یوې خبري ناستې په ترڅ کې په روسیه کې مېشت د افغان سوداګر له لوري ۵۵ ټنه مرسته شوي خوراکي توکي ترلاسه کړل.
په دې مراسمو کې، محترم ترابي صاحب, په مسکو کې د افغان بزنس سنټر له رئیس، محترم نادرشاه، څخه د مننې او قدردانۍ ترڅنګ، له خیریه بنسټونو او بهر مېشتو هېوادوالو څخه د کورنیو زیانمنو کسانو په مرسته کولو کې د هغوی همکارۍ وستایله او دا یې د ملي پیوستون یوه بېلګه وبلله.
هغه زیاته کړه چې دغه مرستې ۱۰۰۰ بورۍ ۲۵ کیلویي اوړه، ۱۰۰۰ بورۍ ۲۵ کیلویي وریجې او ۱۰۰۰ بوتله ۵ لیټره غوړي دي، چې په ټولیز ډول ۵۵ ټنه خوراکي توکي جوړوي.
د ادارې سرپرست ټینګار وکړ چې دغه مرستې به د رسمي پړاوونو له بشپړېدو وروسته، د کابل ولایت مستحقینو او د طبیعي پېښو زیانمنو کورنیو ته ووېشل شي.
همدارنګه، محترم ترابي صاحب د دې نیک اقدام هرکلی وکړ او ویې ویل چې د حاجي نادرشاه صاحب دا اول ځل نه‌ دی چې زموږ سره د بېوزلو لپاره مرستې کوي، بلکې پخوا یې هم څو ځله زموږ سره مرستې کړې دي، او نوموړی دا مرستې په یوازې سر کوي، نورو سوداګرو پکښې ونډه نده اخیستې.  
ترابي صاحب له ټولو بنسټونو، سوداګرو او بهر مېشتو افغانانو څخه غوښتنه وکړه چې د اړمنو کسانو په مرسته کې له دې ادارې سره همکاري وکړي.

نېټه: ۱۴۴۷/۱/۲۳ هـ ق
له پېښو سره د مبارزې ملي اداره