له پېښو سره د مبارزې آمادګۍ ملي ادارې سرپرست د OAWCK موسسې د پروګرامونو له مسوول سره د ۲۶۰۴۰۵ امریکایی ډالرو په ارزښت د ګډو همکاریو تفاهمنامه لاسلیک کړه
نن ورځ د دوشنبې په سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د OAWCK موسسې د پروګرامونو له مسوول محترم عبدالوارث کریمي سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
ترابي صاحب د ښه راغلاست ترڅنګ وویل: موږ مسؤلیت لرو چې موسسو ته لازمې اسانتیاوې برابرې کړو او ټولو ولایتي رئیسانو ته مو لارښوونه کړې چې له موسسو سره لازمه همکاري وکړي. نوموړي زیاته کړه چې زموږ موخه د هېواد په کچه زیانمنو او بېوزلو خلکو ته رسېدنه او هغوی ته د مرستو رسول دی.
ترابي صاحب وویل چې د افغانستان خلک د طبیعي پېښو له امله زیانمن شوي او مرستو ته اړتیا لري، نو له موسسو یې وغوښتل چې خپلې مرستې د ژمي له موسم څخه مخکې ووېشي.
وروسته، د OAWCK موسسې د پروګرامونو مسوول عبدالوارث کریمي، د ادارې له سرپرست څخه د مننې ترڅنګ وویل: یاده مؤسسه له ۲۰۱۰ کال راهیسې د پوهنې، د اوبو رسولو شبکو، روغتیا او کرنې په برخو کې فعالیت کوي او خلکو ته یې ارزښتناک خدمتونه وړاندې کړي دي.
نوموړي زیاته کړه چې یاده موسسه به د ملګرو ملتونو د سازمان په مالي ملاتړ، په سمنګان ولایت کې د روی دوآب او خرم سارباغ ولسوالیو ۶۰۰ زیانمنو، بېوزلو او راستنېدونکو کورنیو ته نغدي او غیر نغدي مرستې ووېشي.
د دې تفاهمنامې له مخې به د ۲۶۰۴۰۵ ډالرو په ارزښت نغدي مرستې د سمنګان ولایت د روی دوآب او خرم سارباغ ولسوالیو ۶۰۰ کورنیو ته ووېشل شي، چې له مخې به یې هرې کورنۍ ته ۲۷۴ ډالره یا دهغو معادل افغان د سون توکو او د ژمي جامو د پېرلو لپاره ورکول کېږي، او همداراز، به د ۵۷ ډالرو په ارزښت ۵ کمپلې (۴ یو نفره او ۱ دوه نفری وېشل سی.
نېټه:۱۴۴۶/۸/۱۱
له پېښو سره د مبارزې آمادګۍ ملي اداره
