له پېښو سره د مبارزې آمادګۍ ملي ادارې سرپرست د یوسف مصور د مېوې وچولو د ماشینونو د تولید شرکت له پلاوي سره وکتل

نن سهار د پنجشنبې په ورځ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي د سوداګرو د ټولنې د عامه اړیکو له رئیس عبدالقادر عاشوري، د یوسف مصور شرکت له نوښتګر او رئیس، انجنیر عبدالوکیل حمیدپور، او همداراز له محمد ابراهیم او محمد هاشم بایقرا سره په خپل کاري دفتر کې وکتل او د دوی د مېوو د وچولو د ماشینونو د نوښت، د هغوی د کار کولو څرنګوالي او د بېلابېلو ولایتونو لپاره د کارولو په اړه یې خبرې واورېدې.
په دې ناسته کې ترابي صاحب د یاد شرکت پلاوي ته د ښه راغلاست ویلو ترڅنګ زیاته کړه، چې د دوی د تولید شویو ماشینونو په پام کې نیولو سره، په کرنیزو محصولاتو کې پانګونه کولای شي هېواد پر ځان بسیا کړي، او له بل پلوه دا کار د خلکو لپاره د کار زمینې برابرولی شي. هغه زیاته کړه، چې موږ نه یوازې تاسو د دې کار دوام ته هڅوو، بلکې کوښښ کوو چې موسسې هم وهڅوو څو له دغو ماشینونو څخه د بدیلې مرستې په توګه ګټه واخلي.
همداراز، د یاد شرکت پلاوي د ماشینونو ډولونه، د هغو د کار طریقه، په ټولنه کې یې اغېزمنتیا، قیمت او د مېوو او سبزیو د وچولو څرنګوالی تشریح کړ او زیاته یې کړه، چې دا ماشینونه د لمریزې برېښنا (سولري بریښنا) له لارې کار کوي، او ظرفیت یې له ۱۰ کیلو ګرامه تر ۵۰۰۰ کیلو ګرامه پورې رسېږي.
هغوی یادونه وکړه، چې هر کوچنی کورنۍ ماشین کولای شي د یوې کورنۍ لپاره په یوه ورځ کې له ۵۰۰ څخه تر ۷۰۰ افغانیو پورې عاید ولري، چې دا کار په هېواد کې د بیکارۍ په کمښت کې خورا اغېزناک تمامېږي.
د یادونې وړ ده, چې د دې ناستې په پای کې، ګډونوالو ته د ماشینونو په اړه یو بشپړ پرېزینټېشن وړاندې شو. په دې پرېزینټېشن کې معلومات ورکړل شول چې د هر ډول تازه مېوې لپاره داسې ماشینونه جوړ شوي چې کولای شي په ۱۲ ساعتونو کې تر ۵ ټنه مېوه وچه کړي. د دې ماشینونو له لارې وچې شوې مېوې به د لوړ کیفیت درلودو تر څنګ, پاکې, بې له دوړې او ډېرې شفافې وي او په بازار کې به د نورو مېوو په پرتله په لوړ قیمت پلورل کېږي. د بېلګې په توګه، د دغو ماشینونو له لارې د انځر، ممیز یا نورو مېوو وچول به ښه ګټه ولري.
 
نېټه:۱۴۴۶/۱۱/۱۰ هــ ق
له پېښو سره د مبارزې آمادګۍ ملي اداره