له پېښو سره د مبارزې آمادګۍ ملي ادارې سرپرست د کډوالۍ نړیوال سازمان له مشرې سره وکتل
کابل- د ربیع الاول ۷-۱۴۴۶
له پېښو سره د مبارزې آمادګۍ ملي ادارې سرپرست الحاج ملا نورالدین ترابي نن سهار په خپل کاري دفتر کې په افغانستان کې د کډوالۍ نړیوال سازمان (IOM) له مشرې تیا مسکان، د بشري مرستو همغږي کونکی عدنان او همکارانو سره یې لیدنه او هر اړخېزې خبرې وکړې.
په دې لیدنه کې محترم الحاج ملا نورالدین ترابي د کډوالۍ نړیوال سازمان مشرې تیا مسکان ته ښه راغلاست ووېل او د افغانستان خلکو ته یې د یادې موسسې لخوا ترسره سویو مرستو په اړه یادونه وکړه او زیاته یې کړه چې، اړتیا ده چې د افغانستان اړمنو او زیانمنو خلکو ته د رسېدنې لپاره په ګډه سره کار وکړو او په دی برخه کې لا زیاتې هڅې وکړو.
همدارنګه ښاغلي ترابي صاحب زیاته کړه چې، زما د کار پالیسي داسې ده چې د موسسو لپاره چې د افغانستان خلکو ته مرستې رسوي هغوی ته آسانتیاوې برابرې کړم، د دې ترڅنګ نوموړي له یاد سازمان څخه د موټرو او د ادارې لپاره نورو اړینو وسایلو برابرولو، د خوراکي او غیرخوراکي توکو د ساتنې لپاره د ګدامونو جوړولو او د خیمو غوښتنه وکړه.
ورته مهال د کډوالۍ نړیوال سازمان مشرې تیا مسکان له ښاغلي ترابي صاحب څخه په مننې او قدردانۍ سره ووېل: چې موږ تل زیانمنو ته د رسېدنې لپاره د دې ادارې سره په همغږي کار کړی دی او په راتلونکې کې به هم زیانمنو ته د رسېدنې په برخه کې له یو بل سره همکاري وکړو، او موږ هڅه کوو چې د بېړنیو حالاتو په رامنځته کېدو سره په وخت سره خپلې مرستې ورسوو، همدارنګه نوموړي د اقلیمي بدلون د اغېزو په اړه یادونه وکړه چې د افغانستان خلک د اقلیم د بدلون له امله بېځایه سوې دي او په دی برخه کې خلک مرستو ته اړتیا لري.
همدارنګه تیا مسکان، په راتلونکې کې د دې ادارې د ولایتي ریاستونو د NDMIS برخې ته د کمپیوټرونو ورکولو او د سولري سیسټم جوړولو خبر ورکړ او زیاته یې کړه چې د ګدامونو جوړولو په برخه کې به له ډونرانو سره خبرې وکړو.
په پای کې دواړو لوریو په راتلونکې کې زیانمنو هیوادوالو ته د رسېدنې، وقایوي پروژو پلي کولو او د همکاري او همغږي پر پیاوړي کولو ټینګار وکړ.
