له پېښو سره د مبارزې آمادګۍ ملي ادارې سرپرست د پنجشیر ولایت له پېښو سره د مبارزې آمادګۍ ریاست د ودانۍ لپاره له ځانګړې شوې ځمکې او د خطر سره د مخ هغو سیمو څخه لیدنه وکړه چې ټاکل شوې ده هلته وقایوي پروژه پکې پلي شي
نن سهار دوشنبه، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، چې د اداري چارو او وقایوي پروژو د ارزونې په موخه یې څو ولایتونو ته سفر کړی، د پنجشیر ولایت د خطر سره د مخ له څو هغو سیمو څخه لیدنه وکړه چې ټاکل شوې ده هلته وقایوي پروژه پکې پلي شي او همدارنګه، له پېښو سره د مبارزې آمادګۍ ریاست د اداري ودانۍ لپاره له ځانګړې شوې ځمکې څخه یې هم لیدنه وکړه.
محترم ترابي صاحب د یادو سیمو د لیدنې پر مهال وویل چې د وقایوي پروژو پلي کېدل په هغو سیمو کې چې د طبیعي پېښو له خطر سره مخ دي، ډېر مهم او حیاتي دی. نوموړي زیاته کړه چې دا اداره هڅه کوي د لا زیاتو پروژو په پلي کولو سره د پېښو خطرونه راکم کړي. هغه دا هم وویل چې د ریاست لپاره د اداري ودانۍ جوړول اړینه ده، ځکه چې مناسب کاري چاپېریال د خدماتو په وړاندې کولو مستقیم اغېز لري او موږ به هڅه وکړو چې ژر تر ژره د دې ودانۍ د جوړېدو لپاره عملي ګامونه پورته کړو.
د یادونې وړ ده چې د عالیقدر امیرالمؤمنین حفظهالله د حکم پر بنسټ، ټولټال د ۱,۰۴۷,۹۰۰ (یو میلیون او اووه څلوېښت زره نهه سوه) افغانیو په ارزښت څلور کوچنۍ پروژې د دې ادارې له خوا د پلي کېدو لپاره منظورې شوي چې دا مهال د تدارکاتو او عملي کېدو په پړاو کې دي. چې په دې پروژو کې د دره ولسوالۍ په سوپر کرامان کلي کې د یوې ډبرې نړول، د دری ولسوالۍ په زردي تمبنه کلي کې د یوې ډبرې نړول، د مرکز په نوه لیج کلي کې د یوې ډبرې نړول او د بازارک په خاص مرکز کې د ۳۰ مترو په اوږدوالي د استنادي دیوال جوړول شامل دي.
همدارنګه، د پنجشیر ولایت په دویمې امنیتي حوزه کې، له پېښو سره د مبارزې آمادګۍ ریاست د ودانۍ لپاره ځانګړې شوې ځمکه چې مساحت یې ۱,۲۰۰ متر مربع دی او د دې ودانۍ د جوړېدو بودجې د برابرولو هڅې روانې دي.
نېټه: ۱۴۴۶/۱۲/۲۶ هـ ق
له پېښو سره د مبارزې آمادګۍ ملي اداره
