له پېښو سره د مبارزې آمادګۍ ملي ادارې او په افغانستان کې د ملګرو ملتونو د بشري مرستو د همغږۍ ادارې (UN_OCHA) ترمنځ احتمالي وچکالۍ ته د ځواب وینې په اړه تخنیکي غونډه ترسره شوه

نن د سې شنبه سهار، دا غونډه د پلان او پالیسۍ د رئیس ملا محمد جاوید عباس، د نړیوالو اړیکو د ریاست سرپرست برهان الدین خان، د UN_OCHA د ستراتیژۍ او همغږۍ رئیسې مانیه، د UN_OCHA د احتمالي پلانونو او نړیوالې وچکالۍ مسئولې جولیه، د UN_OCHA کارمند پاسکل، د UN_OCHA همغږي کوونکي شمس خلیلي او د دې ادارې د یو شمېر آمرینو او کارکوونکو په شتون کې ترسره شوه.
په دې غونډه کې، د نړیوالو اړیکو د ریاست سرپرست برهان الدین خان، د بېلابېلو موسسو د ښې همغږۍ قدرداني وکړه او ویې ویل چې له پېښو سره د مبارزې آمادګۍ ملي ادارې مشرتابه د وچکالي د مدیریت په برخه کې د فعاله موسسو سره هر ډول همکاري ته چمتو ده او د هغوی ملاتړ کوي.
د غونډې په دوام کې، په تېرو درې میاشتو کې د هیدرومتروولوجیکي پارامترونو او د راتلونکو وړاندوینو په شمول د ملي او نړیوالو سازمانونو د وړاندوینو او تحلیلونو په اړه بحث وشو او دا تحلیلونه د تیرو کلونو له ارقامو سره پرتله شول.
د غونډې په پای کې ټینګار وشو چې د وچکالۍ د مدیریت لپاره باید د ورښتونو ارقام او د موجوده سرچینو معلومات په دولتي ادارو او د بشري مرستو په نړیوالو سازمانونو کې سره یوځای شي او پرېکړه وشوه چې د وچکالۍ د مدیریت او رسیدنې پلان ترتیب شي.

نېټه:۱۴۴۶/۹/۴
له پېښو سره د مبارزې آمادګۍ ملي اداره