له پېښو سره د مبارزې آمادګۍ ملي ادارې او د WCCSO موسسې ترمنځ د ګډو همکاریو تفاهم نامه لاسلیک شوه
نن د شنبې په ورځ، د غرمې مخکی ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي په خپل کاري دفتر کې، په کابل کې د WCCSO موسسې له مسؤل نورمل نظري سره وکتل او د ګډو همکاریو تفاهمنامه یې ورسره لاسلیک کړه.
ترابي صاحب په دې کتنه کې، د ښه راغلاست ویلو ترڅنګ ټینګار وکړ چې له پېښو سره د مبارزې آمادګۍ ملي اداره همېشه د مرسته رسوونکو موسیسو سره همکاري کوي، ځکه د دوی کړنې د پېښو د مدیریت په هره برخه کې د هېواد د وګړو په ګټه دي.
وروسته د WCCSO موسسې استازي د یادې پروژې په اړه د معلوماتو د ورکولو په جریان کې و ویل، دغه پروګرام به د خوړو نړیوال سازمان په مالي مرسته ترسره شي. همدارنګه د دې پروژې په چوکاټ کې د WCCSO موسسه د تخنیکي، اداري او سروې چارې په غاړه لري او په نورستان ولایت کې به د ۱۹,۸۳۶ ډالرو په لګښت په بیړنیو حالاتو کې پلې کېږي.
د دې تفاهمنامې پر بنسټ، به د خوراک نړیوال سازمان په مالي مرسته په بیړنیو حالاتو کې د WCCSO موسسې سره په همغږۍ د مرستو بستې چې ۱۰۰ کیلو اوړو، ۱۲.۵ کیلو دال نخود، ٩.١ کیلو غوړي او یوه کیلو مالګه پکې شتون لري د نورستان ولایت ١٦٠٠ کورنیو ته ووېشل شي.
نېټه: ١٤٤٦/٩/٨
له پېښو سره د مبارزې آمادګۍ ملي اداره
