له پېښو سره د مبارزې آمادګۍ ملي ادارې او د CRS موسسې ترمنځ د ۲۳۷,۰۰۰ ډالرو په ارزښت د ګډو همکاریو تفاهمنامه لاسلیک شوه
نن د پنجشنبې سهار، له پېښو سره د مبارزې آمادګۍ ملي ادارې سرپرست الحاج ملانورالدین ترابي، د کاتولیک نړیوالې خیریه مؤسسې (CRS) له رئیسې مارګریت وودز او د هغې له مل پلاوي سره په خپل کاري دفتر کې وکتل او د ګډو همکاریو تفاهمنامه یې ورسره یې لاسلیک کړه.
په دې ناسته کې ترابي صاحب ټینګار وکړ چې له پېښو سره د مبارزې آمادګۍ ملي اداره تل له مرستندویو موسسو سره همکاري کوي، ځکه چې د دوی فعالیتونه د پیښو مدیریت او د هېوادوالو د خیر لپاره دي.
له بلې خوا، د کاتولیک نړیوالې خیریه مؤسسې (CRS) رئیسې مارګریت وودز، له پېښو سره د مبارزې آمادګۍ ملي ادارې له سرپرست څخه مننه وکړه او څرګنده یې کړه چې CRS موسسې له ۱۳۸۱ کال راهیسې د بیړنیو مرستو، د اوبو رسولو د شبکو پراختیا او د کرنې په برخه کې مهم فعالیتونه ترسره کړي دي.
میرمن وودز د خپلې نوې پروژې په اړه معلومات وړاندې کړل او ویې ویل چې دا پروژه د UN-OCHA لخوا تمویل شوې او د CRS موسسې له لارې به د ۲۳۷,۰۰۰ ډالرو په ارزښت په ټولیزې بودجې د هرات ولایت اړمنو ته وېشل کېږي.
د دې تفاهمنامې له مخې، د ۲۳۷,۰۰۰ ډالرو په ټولیز ارزښت به د هرات ولایت په ګلران ولسوالۍ کې ۵۴۵ کورنیو ته ۷۴ ډالره د ژمنیو جامو پېرلو لپاره، ۲۰۰ ډالره د سون توکو پېرلو لپاره او ۵ تختې (یوه دوه کسیزه او څلور یو کسیزه) کمپلې د ۵۷ ډالرو په ارزښت ووېشل شي.
نېټه:۱۴۴۶/۹/۱۳
له پېښو سره مبارزې آمادګۍ ملي اداره
