له پېښو سره د مبارزې آمادګۍ ملي ادارې او د AWDREO مؤسسې ترمنځ ټولټال د دوه سوه او پنځه پنځوس زره او درې سوه او اووه (۲۵۵,۳۰۷) ډالرو په ارزښت د ګډو همکاریو تفاهمنامه لاسلیک شوه
نن د سېشنبه سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، په خپل کاري دفتر کې د AWDREO مؤسسې له کفیل، ذاکر حسین احمدي سره وکتل او د ګډو همکاریو تفاهمنامه یې ورسره لاسلیک کړه.
محترم ترابي صاحب په دې ناسته کې وویل، چې دې ادارې د مرکز په کچه د مؤسسو لپاره لازمې اسانتیاوې او د فعالیت زمینه برابره کړې ده او همدارنګه د خپلو ولایتي ریاستونو له لارې په ولایتونو کې هم له مؤسسو سره د هغوی د پروژو د پلي کېدو تر پړاو پورې همکاري کوي. نوموړي له مؤسسو وغوښتل، چې خپل کارونه په چټکۍ او شفافیت سره ترسره کړي، تر څو زیات خلک له مرستو برخه من شي.
په همدې حال کې، د یادې مؤسسې کفیل، ذاکر حسین احمدي، له محترم ترابي صاحب څخه مننه وکړه، چې د هغوی ستونزې حتی په نورو ادارو کې هم تعقیب او حل کوي، او د پروژو پر وخت او د شفاف پلي کېدو ژمنه یې وکړه.
په پای کې، د دواړو لوریو ترمنځ ټولټال د دوه سوه او پنځه پنځوس زره او درې سوه او اووه (۲۵۵,۳۰۷) ډالرو په ارزښت د ګډو همکاریو تفاهمنامه لاسلیک شوه، چې له مخې به یې یاده مؤسسه په جوزجان ولایت کې لاندې فعالیتونه ترسره کړي:
۱. ۱۶,۵۷۴ مستحقو کورنیو ته، چې مخکې د SFL دفتر له لوري سروې شوې دي او د دوو میاشتو خوراکي او نغدې مرستې یې ترلاسه کړې دي، د پاتې یوې میاشتې (د ۲۰۲۶ کال د جنورۍ میاشتې) خوراکي او نغدې مرستې به د AWDREO مؤسسې له لوري د خوړو نړیوال پروګرام (WFP) په ملاتړ یادو کورنیو ووېشل شي.
۲. د شپږو میاشتو لپاره به د ۲۶,۸۴۷ مستحقو کورنیو سروې او هغوی ته به مرستې ووېشل شي، چې له مخې به یې هره میاشت د AWDREO مؤسسه یادو کورنیو ته د خوړو نړیوال پروګرام (WFP) په ملاتړ خوراکي توکي، هرې کورنۍ ته ۵۰ کیلو اوړه، ۴.۵ لیټره غوړي، ۶.۲۵ کیلولوبیا او نیم کیلو مالګه، او یا د بدیل په توګه هرې کورنۍ ته د ۲,۹۰۰ افغانۍ نغدې مرستې ووېشي.
نېټه:۱۴۴۷/۷/۲۳ هـ ق
له پېښو سره د مبارزې آمادګۍ ملي اداره
