له پېښو سره د مبارزې آمادګۍ ملي ادارې او د ASIO مؤسسې ترمنځ د ۲۹۸،۷۱۱ ډالرو په ارزښت د ګډو همکاریو تفاهم نامه لاسلیک شوه 

 نن ورځ سې شنبې له غرمې وروسته، له پېښو سره د مبارزې آمادګۍ ملي ادارې سرپرست؛ محترم الحاج ملا نورالدین ترابي، د افغانستان ټولنیزې پیاوړتیا (ASIO) له رئیس؛ محترم عبد الهادي کریمي سره په خپل کاري دفتر کې وکتل او د ګډو همکاریو تفاهم‌نامه یې ورسره لاسلیک کړه.
په پیل کې، ترابي صاحب د یادې مؤسسې راغلي پلاوي ته ښه راغلاست وویل او ویې ویل، چې موږ زیانمنو شویو خلکو ته د ژر رسېدنې په موخه مؤسسو ته د پام وړ آسانتیاوې برابرې کړي دي، نو له همدې امله له مؤسسو څخه دا هیله لرو، چې خپلې پروژې دې پروخت او شفاف ډول سره د زیانمنو شویو لپاره تطبیق کړي. 
ورپسې، محترم کریمي د خپلې پروژې په اړه معلومات وړاندې کړل او زیاته یې کړه، چې موږ په دې هڅه کې یو چې په وخت سره وړ کسانو ته مرستې ورسوو.  
 د یادونې وړ ده، چې په پای کې د دواړو لوریو تر منځ ټولټال د دوه سوه، آته نوي زره او اووه سوه او یوولس (۲۹۸،۷۱۱) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د سمنګان ولایت په بېلابېلو ولسوالیو او مرکز ایبک ښار کې ۷،۶۳۶ اړمنو او بېوزله کورنیو ته په بېلابېلو پړاوونو کې نغدي پیسې او خوراکي توکي ووېشل شي.
 لومړی پړاو: ٣٦٣ کورنیو ته به څلور میاشتنۍ مرستې په یوه دوره کې هرې کورنۍ ته ٢٠٠ کیلو اوړه، ١٨.٢ کیلو غوړ، ٢٥ کیلو دال او ٢ کیلو مالګه په یوه پړاو کې ووېشل شوي.
دوه یم پړاو: ٦،١٨٢ کورنیو ته به په شپږو میاشتو کې، هره میاشت هرې کورنۍ ته ٥٠ کیلو اوړه، ٤،٥٥ کیلو غوړي، ٦.٢٥ کیلو دال او ٠.٥ کیلو مالګه ووېشل شي.
درېیم پړاو: ١،٠٩١ کورنیو ته به په شپږو میاشتو کې، هرې کورنۍ ته ٢،٩٠٠ افغانۍ ووېشل شي. 

نېټه: ۱۴۴۷/۱/۱۲ هـ ق
له پېښو سره د مبارزې آمادګۍ ملي اداره