له پېښو سره د مبارزې آمادګۍ ملي ادارې او د کلیو د بیا رغونې مؤسسې (RRAA) ترمنځ د اته نوي زره او درې سوه اووه پنځوس (۹۸,۳۵۷) ډالرو په ارزښت د ګډو همکاریو تفاهم نامه لاسلیک شوه
نن ورځ سې شنبه له غرمې ورسته، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د کلیو د بیا رغونې مؤسسې له رئیس، محترم ریاض الله ولي سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
ترابي صاحب په خپلو خبرو کې د یادې موسسې پلاوي ته ښه راغلاست وویل او زیاته یې کړه چې باید افغان ولس ته د اساسي کارونو زمینه برابره شي.
همدا راز ترابي صاحب وویل، چې موږ تل هڅه کوو چې د مؤسسو کارونه بې له ځنډه ترسره کړو تر څو افغان ولس له مرستو څخه برخمن شي.
وروسته د کلیو د بیا رغونې مؤسسې رئیس، ریاض الله ولي د ترابي صاحب څخه د لیدنې د زمینې برابرولو په پار مننه وکړه او زیاته یې کړه چې دې ادارې تل زموږ سره همکاري کړې ده او موږ هم تل په دې هڅه کې یو چې خلکو ته مرستې ورسوو.
ښاغلي ولي وویل، چې د ترابي صاحب په راتګ سره د دې ادارې په کارونو کې چټکتیا او زیات شفافیت لیدل کیږي.
د یادونې وړ ده، چې د ناستې په پای کې، د دواړو لوریو ترمنځ ټولټال د اته نوي زره او درې سوه اووه پنځوس (۹۸,۳۵۷) ډالرو په ارزښت تفاهم نامه لاسلیک شوه، چې له مخې به یې د هرات ولایت د پښتون زرغون ولسوالۍ په ۱۲ کلیو کې ۳۲۰ مسلکي او غیر مسلکي کسان پر کار وګمارل شي، او هر مسلکي کس ته به د هرې ورځې د کار په بدل کې د ۱۰ ډالرو معادل افغانۍ او غیر مسلکي کس ته به د هرې ورځې د کار په بدل کې د ۵ ډالرو معادل افغانۍ ورکول کیږي، او د اړوندو کلیو خلکو ته به عامه پوهاوی ورکړل شي، د دې ترڅنګ د اوبو د مدیریت ۱۲ کمېټې به جوړې شي او د اوبو د ساتنې په اړه به روزنه ورکول کېږي، همدا راز د طبیعي سرچینو د مدیریت په اړه به د ټولنې د یو شمېر خلکو لپاره روزنیز ورکشاپونو ترسره شي او د دوامداره كرنې، د اوبو د ساتنې او د خاورې د شړېدو د کنټرول په اړه به معلومات وړاندې کېږي.
نېټه: ۱۴۴۷/۱/۲۶ هــ ق
له پېښو سره د مبارزې آمادګۍ ملي اداره
