له پېښو سره د مبارزې آمادګۍ ملي ادارې او د هیلپ جرمني مؤسسې ترمنځ د نږدې ۶.۵ شپږ نیم میلیونه ډالرو په ارزښت د ګډو همکاریو تفاهم نامه لاسلیک شوه

نن ورځ شنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي د هیلپ جرمني مؤسیسې د پروګرامونو مدیر او مرستیال سید احمد بسیم ګیلاني سره په خپل کاري دفتر کې وکتل.
 ترابي صاحب د هیلپ جرمني موسسې مرستیال ته د ښه راغلاست ویلو ترڅنګ وویل چې موږ ستاسو د مرستو هرکلی کوو او د مؤسیسو سره د همکارۍ په لټه کې یو ترڅو هغوی ته د لا ښه فعالیت زمینه برابره کړو  نوموړي همداراز وویل چې نه یوازې ستاسو تفاهم‌ نامه به بې له ځنډه لاسلیک کړم  بلکې هغو ولایتي ریاستونو ته چې تاسو پکښې پروژې لرۍ هغوی ته به هم لارښوونه وکړم ترڅو ستاسو په کار کې هیڅ ډول خنډ رامنځته نه شي.
ورسته سید احمد بسیم ګیلاني  د هیلپ جرمني موسسې مرستیال د دې ادارې د چټک کاري بهیر ستاینه وکړه او د یادې موسسې په اړه یې معلومات وړاندې کړل. هغه وویل چې هیلپ جرمني موسسه په ۲۱ بېلابېلو هېوادونو کې فعالیت کوي، او یوه غیردولتي موسسه ده، او دا مهال د هېواد په لویدیځ زون کې فعالیت کوي.
د یادونې وړ ده چې د دې موسسې لخوا د نن ورځې د لاسلیک شوې تفاهم نامې له مخې، د ۶،۴۷۹،۳۹۸ ډالرو په ارزښت په لویدیځ زون کې له ۲۷۱۲۰ کورنیو سره نغدي او غیر خوراکي مرستې ترسره کېږي چي 
له دې جملې، ۱۵۵۶۰ کورنیو ته به د هرې کورنۍ لپاره د ۱۵۸.۳۰ ډالرو په ارزښت مرسته په دوو مرحلو کې، د خلکو اړتیاوو ته په کتو سره، نغدي یا خوراکي او یا هم غیر خوراکي مواد ویشل کېږي. په دې توګه، ۴۸۳۶ کورنیو ته په هرات ولایت کې، ۳۱۱۲ کورنیو ته په فراه ولایت کې، ۴۵۰۰ کورنیو ته په غور ولایت کې، او ۳۱۱۳ کورنیو ته به په بادغیس ولایت کې مرستې ووېشل شي.
همدارنګه، ۸۰۰۰ کورنیو ته د هرې کورنۍ لپاره د ۲۰۰ ډالرو په ارزښت د ژمي مرسته، د خلکو اړتیاوو ته په پام سره، په نغدي یا غیر نغدي توګه ویشل کېږي. په دې ډول، ۲۰۰۰ کورنیو ته په هرات ولایت کې، ۱۵۰۰ کورنیو ته په فراه ولایت کې، ۲۲۵۰ کورنیو ته په بادغیس ولایت کې، او ۲۲۵۰ کورنیو ته به په غور ولایت کې مرستې ووېشل شي.
په همدې حال کې، ۳۵۶۰ کورنیو ته د هرې کورنۍ لپاره د ۲۰ ډالرو په ارزښت د ښځو ځانګړې یوه بسته ویشل کېږي، چې په دې کې ۱۵۰۰ کورنیو ته په هرات ولایت کې، ۶۶۰ کورنیو ته په فراه ولایت کې، ۷۰۰ کورنیو ته په بادغیس ولایت کې، او ۷۰۰ کورنیو ته به په غور ولایت کې مرستې ووېشل شي.
د یادونې وړ ده چې دا پروژه به د دوو کلونو په موده کې په یادو ولایتونو کې پلي کيږي.

نیټه:۱۴۴۶/۵/۲۱ هــ ق 
له پیښو سره د مبارزې آمادګۍ ملي اداره