له پېښو سره د مبارزې آمادګۍ ملي ادارې او د زرغون افغانستان کرنې او مالدارۍ موسسې ترمنځ ټولټال د اوه زره او درې سوه او یو نوي (٧،٣٩١) ډالرو په ارزښټ د ګډو همکاریو تفاهم نامه لاسلیک شوه 

نن ورځ دوشنبې له غرمې وروسته، له پېښو سره د مبارزې آمادګۍ ملي ادارې د مالي او اداري عمومي رئیس، محترم الحاج مولوي محمد عالم علمیار د زرغون افغانستان کرنې او مالدارۍ مؤسسې له رییس، محترم ډاکټر غلام سرور ظهیر سره وکتل او د ګډو همکاریو تفاهم نامه یې ورسره لاسلیک کړه. 
محترم الحاج مولوي محمد عالم علميار په دې ليدنه کې وويل، چې افغانستان د ټولو ګډ کور دی او هر افغان باید نورو هېوادوالو ته د مرستو رسولو په هڅه کې وي، نو له همدې امله د دې تفاهم‌نامې لاسليک کول د هېواد له زیانمنو خلکو سره د مرستې په لاره کې يو مهم ګام دی او موږ د داسې پروژو له پلي کېدو هرکلی کوو.
همدارنګه د زرغون افغانستان کرنې او مالدارۍ موسسې رییس، محترم ډاکټر غلام سرور ظهیر، د يادي پروژې په اړه معلومات وړاندې کړل او ویې ویل لومړنۍ ځل دی چې له دولتي ادارې سره زموږ کارونه په چټکۍ سره مخکې ځي، چې له همدې امله له پېښو سره د مبارزې آمادګۍ ملي ادارې له رهبرۍ او کار کوونکو څخه مننه کوم.
په پای کې، دواړو لوريو ټولټال د اوه زره درې سوه او یو نوي (٧،٣٩١) ډالرو په ارزښت د ګډو همکاریو تفاهم نامه لاسليک کړه. چې له مخې به یې، ياده موسسه د خوړو نړیوال پروګرام په ملاتړ د خوست ولايت په ولسواليو کې، د پېښې رامنځته کېدو په صورت کې او له سروې وروسته، ١٦٩ کورنيو ته نغدي او يا هم خوراکي توکي ووېشي. په نغدي مرستو کې به هرې کورنۍ ته ٢٩٠٠ افغانۍ ورکړل شي، او په خوراکي مرستو کې به هرې کورنۍ ته ٥٠ کيلو اوړه، ٤.٥٥ کيلو غوړي، نیم کيلو مالګه او ٦.٢٥ کيلو دال ووېشل شي.

نېټه: ۱۴۴۷/۲/۱۷ هـ ق
له پېښو سره د مبارزې آمادګۍ ملي اداره