د ORCD Global موسسې له پېښو سره د مبارزې آمادګۍ ملي ادارې د روغتیایي مرکز سره د ۳۲ قلمه اړینو درملو مرسته وکړه

نن سهار د پنجشنبې په ورځ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د ORCD Global  موسسې له رئیس ډاکتر حیدر سره په خپل کاري دفتر کې وکتل او د دې موسسې لخوا د یادې ادارې د روغتیایي مرکز لپاره د مرسته شویو درملو په اړه یې خبرې وکړې.
ترابي صاحب د یادې موسسې پلاوي ته ښه راغلاست وویل او د دوی له مرستو یې مننه وکړه. هغه زیاته کړه چې څه موده وړاندې له ازبکستان هېواد څخه د دې ادارې سره د ۳.۵ ټنه بېلابېلو درملو مرسته وشوه؛ خو موږ هغه درمل په ګدام کې ذخیزه نه کړل، بلکې د تورخم د کډوالو پنډغالي اړوند ۱۲ کلینیکونو او د عامې روغتیا روغتونونو ته مو وویشل، ځکه د شریعت له مخې هم د درملو بېځایه ذخیره کول ناروا عمل ګڼل کېږي.
د ادارې سرپرست وویل، چې د افغانستان خلک هر ډول مرستو ته اړتیا لري او موږ د هرې مرستې، که زیاته وي یا کمه، په خوښۍ یې هرکلی کوو.
ورته مهال، د ORCD Global موسسې رئیس، ډاکتر حیدر، د تېرو پروژو د پلي کولو په برخه کې د یادې ادارې له همکارۍ مننه وکړه او دغه اداره یې یوه مهمه، اغېزمنه او فعاله اداره وبلله. هغه دا هم وویل چې د دې ادارې د غوښتنې له مخې، نن ورځ ۳۲ قلمه اړین درمل د یادې ادارې د روغتیایي مرکز لپاره پېرل شوي او یاد مرکز ته به وسپارل سول، تر څو د اړتیا پر مهال د کارکوونکو د ستونزو د حل لپاره ترې ګټه واخیستل شي.

نېټه:۱۴۴۶/۱۱/۱۷ هــ ق
له پېښو سره د مبارزې آمادګۍ ملي اداره