د کندهار ولایت په شاه ولیکوټ ولسوالۍ کې ناچاوده توکي کشف او خنثی شول
د کندهار ولایت له پېښو سره د مبارزې آمادګۍ ریاست په همغږۍ، د هیلو ټرسټ ماین پاکۍ مؤسسې د (QR-09) چټک غبرګون ټیم د کندهار ولایت د شاه ولیکوټ ولسوالۍ د المش کلي په سیمه کې ناچاوده توکي کشف او په خوندي ډول خنثی کړل.
د ماین پاکۍ تخنیکي ټیم د عملیاتو په ترڅ کې په ټولیز ډول ۵۷ کړۍ ماینونه او ناچاوده توکي کشف او له منځه یوړل، چې د سیمې د اوسېدونکو د ژوند لپاره یې جدي ګواښ رامنځته کړی و. دغه عملیات په خوندي او بریالیتوب سره پای ته ورسېدل.
د کندهار ولایت له پېښو سره د مبارزې آمادګۍ ریاست له ټولو هېوادوالو غوښتنه کوي چې د هر ډول ناچاوده، چاودېدونکو او یا مشکوکو توکو د لیدلو په صورت کې دې له لمس کولو او نږدې کېدو څخه ډډه وکړي او ژر تر ژره دې اړوندو امنیتي او مسؤلو ادارو ته خبر ورکړي، ترڅو لازم اقدامات ترسره شي.
نېټه: ۱۴۴۷/۱۲/۲۵ هـ ق
له پېښو سره د مبارزې آمادګۍ اداره
