د کونړ ولایت په بېلابېلو سیمو کې د زلزله ځپلو د لنډمهاله هستوګنې لپاره د خېمو د درولو بهیر دوام لري
له پېښو سره د مبارزې آمادګۍ ملي ادارې له تېرې ورځې راهیسې، د خپلو شته امکاناتو په کارولو او د همکارو ادارو په ملاتړ، په کونړ ولایت کې د هغو زلزله ځپلو لپاره چې کورونه یې بشپړ نړېدلي او یا د نورو زلزلو له ګواښ سره مخ دي، د لنډمهاله هستوګنې برابرولو په موخه د خېمو د درولو بهیر پیل کړی.
د یادې ادارې مرکزي او ولایتي کارکوونکي نه یوازې د لټون او ژغورنې د عملیاتو، د ټپیانو د لېږد، روغتیايي خدمتونو، د ګرمو خوړو د وېش او په نورو چارو کې فعاله ونډه لري، بلکې د نورګل، څوکۍ او خاص کنړ ولسوالیو په بېلابېلو کلیو کې د زلزله ځپلو لپاره د لنډمهاله هستوګنې برابرولو هڅه هم کوي، ترڅو د خپلو هېوادوالو لپاره د سرپناه زمینه برابره کړي.
د یادونې وړ ده، چې له پېښو سره د مبارزې آمادګۍ ملي اداره ژمنه ده، چې د خپلو همکارو ادارو سره یوځای به زلزله ځپلو ته پر وخت د خدمتونو وړاندې کولو لپاره تر وروستۍ شېبې پورې ولاړه وي.
نیټه: ۱۴۴۷/۰۳/۱۱ هـ ق
له پېښو سره د مبارزې آمادګۍ ملي اداره
