د کونړ ولایت د وروستۍ زلزلې د ۶۱۲ شهیدانو او ټپیانو کورنیو ته خوراکي او غیر خوراکي مرستې ووېشل شوې
د کونړ ولایت له پېښو سره د مبارزې آمادګۍ ریاست او د کار او ټولنیزو چارو ریاست ګډې کمېټې د خیرالنصر مؤسسې، د نصیر خیریه بنسټ، د یونیسف دفتر او د یو افغان سوداګر په ملاتړ د څوکۍ ولسوالۍ د دیوهګل درې په بېلابېلو کلیو کې د ۶۱۲ شهیدانو او ټپیانو کورنیو ته خوراکي او غیر خوراکي مرستې ووېشلې.
په دې بهیر کې, د ګډې کمېټې له لوري ۱۷۰ کورنیو هرې یوې ته توشک، بالښت، سطل، لوټکه، د اوبو ترموز، د اودس کوزه، بیل، کلنګ او سختو زیانمنو کورنیو ته ۱۰۰ باب خیمې، د یونیسف له لوري د هرې کورنۍ لپاره ۴ د اوبو بُشکې او ۴ د اوبو د پاکولو ټابلیټونه، د نصیر خیریه بنسټ له لوري د هرې کورنۍ لپاره یو من وریجې، ۵ لیټره غوړي، یو من لوبیا، یو کیلو شین چای، یوه روغتیایي بسته، ۳۰ کورنیو هرې یوې ته خیمې او هرې کورنۍ ته د پخلنځي یوه بسته، د یو افغان سوداګر له لوري ۴۷ کورنیو هرې یوې ته یو د اوبو ترموز، یوه لوټکه او یوه سترنجۍ ووېشل شوه.
د مرستو ترلاسه کوونکو کورنیو د ګډې کمېټې له دوامدارو هڅو مننه وکړه او دغه مرستې یې اغېزمنې وبللې.
نیټه: ۱۴۴۷/۰۳/۱۴ هـ ق
له پېښو سره د مبارزې آمادګۍ ملي اداره
