د پېښو چارو د همغږۍ معین د جوزجان ولایت له پېښو سره د مبارزې آمادګۍ ریاست څخه لیدنه وکړه
له پېښو سره د مبارزې آمادګۍ ملي ادارې د پېښو چارو د همغږۍ معین، محترم الحاج ملا عبدالولي څارنوال (حاجي وارث)، جوزجان ولایت ته د خپل رسمي سفر په ترڅ کې، له پېښو سره د مبارزې آمادګۍ رئیس، محترم مولوي سراجالدین سراجی او د مل پلاوي په ملتیا د یاد ولایت له پېښو سره د مبارزې آمادګۍ ریاست له ګدام څخه لیدنه وکړه.
په دې لیدنه کې د پېښو چارو د همغږۍ معین د ګدام بېلابېلې برخې لکه د خوراکي او غیــر خوراکي توکو زېرمتونونه، د بیړني حالت تجهیزات، د توکو د ساتنې طریقې، د زېرمتون د ثبت او مدیریت سیستم او د احتمالي پېښو پر وړاندې د ځواب وینې له څرنګوالي څخه لیدنه وکړه.
د جوزجان ولایت له پېښو سره د مبارزې آمادګۍ ریاست مسؤلینو د زېرمتون، د شته مرستو، د وروستي وېش بهیر او بېړنیو اړتیاوو په اړه مفصل او تازه راپور وړاندې کړ. هغوی همدارنګه د مرکزي ادارې له همکارۍ او د ولایتونو د ظرفیــت د پیاوړتیا په برخه کې د پام او ملاتړ څخه مننه وکړه.
د پېښو چارو د همغږۍ معین د سیمه ییزو مسؤلینو له هڅو قدرداني وکړه او ټينګار یې وکړ چې باید د زېرمتون دقیق او شفاف مدیریت، د توکو معیاري ساتنه، د طبیعي پېښو پر وړاندې د چټک غبرګون چمتووالی او د اړوندو ادارو ترمنځ همغږي لا پیاوړې شي. نوموړي اړوندو مسؤلینو ته د زېرمتونونو د پیاوړتیا او د بېړنیو حالاتو پر مهال په ښه توګه د رسېدنې په هکله لازمې لارښوونې وکړې.
نېټه:۱۴۴۷/۶/۱۸ هـ ق
له پېښو سره د مبارزې آمادګۍ ملي اداره
