د پېښو چارو د انسجام معین د بدخشان ولایت له پېښو سره د مبارزې آمادګۍ ریاست له ګدام څخه لیدنه وکړه او د مرستو په مدیریت کې یې پر روڼتیا او نظم ټینګار وکړ
د پېښو چارو د انسجام معین محترم الحاج ملا عبدالوالی څارنوال (حاجي وارث)، بدخشان ولایت ته د خپل رسمي سفر په لړ کې، د منظم کاري پلان له مخې او په نورو ولایتونو کې د مرستندویه توکو د ګدامونو له ارزونې وروسته، د بدخشان ولایت له پېښو سره د مبارزې آمادګۍ رئیس، محترم مولوي محمد اکرم اکبري او د هغه مل پلاوي په ملتیا، د یاد ولایت له پېښو سره د مبارزې آمادګۍ ریاست د خوراکي او غیرخوراکي توکو له ګدام څخه لیدنه وکړه.
د دې لیدنې پر مهال، د پېښو چارو د انسجام محترم معین د ګدام د خوراکي توکو د ساتنې، تنظیم او ترتیب وضعیت له نږدې وڅېړه او د بشردوستانه مرستو د اصولي، شفاف او معیاري مدیریت پر ارزښت یې ټینګار وکړ. نوموړي وویل چې د خوراکي توکو د زېرمه کولو او د وېش په بهیر کې نظم، شفافیت او ځوابوینه د خلکو او همکارو بنسټونو د باور د جلبولو لپاره بنسټیز رول لري.
محترم حاجي وارث همدارنګه لارښوونه وکړه چې معلوماتو ته د لاسرسي د اسانتیا او د شفافیت د لا زیاتوالي په موخه، د ګدام دننه د خوراکي، غیرخوراکي او نورو مرستندویه توکو د ځانګړتیاوو لوحه نصب شي، تر څو د توکو ډول، اندازه، کیفیت، د ترلاسه کولو نېټه او د پای نېټه (انقضا) په واضح ډول په کې درج شي. هغه زیاته کړه چې د دغو مواردو رعایت د توکو له ضایع کېدو مخنیوی کوي او د وېش پر مهال هم اسانتیا، دقت او چټکتیا رامنځته کوي.
په دوام کې، د بدخشان ولایت له پېښو سره د مبارزې د آمادګۍ رئیس، محترم مولوي محمد اکرم اکبري، د پېښو چارو د انسجام معین له پاملرنې، لیدنې او لارښوونو څخه د مننې تر څنګ ډاډ ورکړ چې ټولې ورکړل شوې لارښوونې به په جدي توګه عملي شي او د مرستندویه توکو د ساتنې، ثبت او مدیریت د سیستم د لا ښه والي لپاره به هڅې روانې وساتل شي.
دا لیدنه د څارنې د پیاوړتیا، د شفافیت لوړولو او د پېښو پر وړاندې د چمتووالي او مبارزې په برخه کې د مدیریتي وړتیاوو د ښه کېدو په موخه ترسره شوې او په بدخشان ولایت کې د بشردوستانه مرستو د سالم او اغېزمنې کارونې پر لور یو اغېزناک ګام بلل کېږي.
نېټه: ۱۴۴۷/۰۷/۱۷ هـ ق
له پېښو سره د مبارزې آمادګۍ ملي اداره
