د بغلان ولایت په دندغوري ولسوالۍ کې اسلاميک ریلیف مؤسسې ۳۰۵ کاریګرو کورنیو ته د کار وسایل ووېشل
د بغلان ولایت له پېښو سره د مبارزې آمادګۍ ریاست د اسلاميک ریلیف مؤسسې سره په همکارۍ، د دندغوري ولسوالۍ اړوند کلیو (امرخیل، وردګ، منګل، او ګدایخیل کلیو) کې ۳۰۵ کاریګرو کورنیو ته د کار وسایل ووېشل.
په دې وسایلو کې، بیل، کلنګ، خولۍ، دستکشې، عینکې، جاکټ، او یو جفت بوټونه وو. همدارنګه، کراچۍ، سطل، متر، رسۍ، پمپ، د اوبو سطل، ترموز، او د اوبو بوشکه هم شامل وو.
دغه کاریګر به په یوه شل ورځني دوره کې هغه ویالې چې د وروستیو سېلابونو له امله له خټو ډکې شوې دي، پاکوي. هر کاریګر ته په ورځ کې ۴۰۰ افغانۍ مزد ورکول کېږي چې په مجموع کې هر یو ته ۸۰۰۰ افغانۍ کېږي. د ۳۰۵ کاریګرو لپاره په مجموع کې ۲۴۴۰۰۰۰ افغانۍ وېشل کېږي.
په همدې حال کې، د امرخیل کلي اوسېدونکو له پېښو سره د مبارزې آمادګۍ ریاست او د اسلاميک ریلیف مؤسسې مسؤلینو څخه د دوی د ستونزو په حل کې د پاملرنې او همکارۍ لپاره مننه وکړه.
۱۴۴۶/۵/۴
له پېښو سره د مبارزې آمادګۍ ملي اداره
