د بامیان ولایت د دولت آباد ملا غلام کلي کې د استنادي دیوال د جوړولو پروژه ګټې اخیستنې ته وسپارل شوه
د بامیان ولایت له پېښو سره د مبارزې آمادګۍ ریاست، د دې ولایت د مرکز اړوند د دولت آباد ملا غلام په کلي کې د یو ملیون افغانیو په ارزښت د استنادي دیوال د جوړولو کار بشپړ او په رسمي ډول سره ګټې اخیستنې ته وسپارل شو.
دا استنادي دیوال د ۱۸۲ مترو په اوږدوالي د بامیان ولایت له پېښو سره د مبارزې آمادګۍ ریاست د رییس؛ مولوي محمد طاهر شاکر، د ولایت مقام د پلاوي چې د ښار او کور جوړونې ریاست مسؤلینو پکې شتون درلود، د اقتصاد ریاست، مستوفیت، ښاروالۍ او د نورو اړوندو ادارو په شتون کې، پرانیستل او ګټې اخیستنې ته وسپارل شو.
د یادونې وړ ده، چې دا پروژه د عالیقدر امیر المؤمنین حفظه الله د لارښوونې له مخې د طبیعي پېښو له امله د رامنځته کېدونکو خطرونو د کمولو په موخه، یو میلیون افغانۍ د وقایوي پروژو د تطبیقولو لپاره په هر ولایت کې ځانګړې شوې دي، چې له پېښو سره د مبارزې آمادګۍ ملي اداره یې د سروې له ترسره کولو او د بیړني حالت له پېژندلو وروسته، دا پروژې د هېواد په کچه پلې کوي.
د دولت آباد ملا غلام کلی، هر کال د درنو سېلابونو له امله سخت زیانونه ویني، چې د هستوګنې د کورونو، د کرنیزو ځمکو او د بامیان ولایت د روغتون د عمومي سړک په اوږدږ کې د ویجاړتیا سبب ګرځي، چې له همدې امله د بامیان ولایت د ولایت مقام او له پېښو سره د مبارزې آمادګۍ ریاست، له اړینو څېړنو څخه وروسته دا پروژه د یوې اساسي اړتیا په عنوان تثبیت او پلې کړه.
د دې پروژې د جوړولو کار د بامیان تمدن د ساختماني او سړک جوړونې شرکت لخوا، چې د داوطلبۍ په قانوني لړۍ کې ګټونکی پېژندل شوی وو په معیاري ډول سره بشپړه او له وروستني تأیید او ارزونې وروسته، ګټې اخیستنې ته وسپارل شو.
نیټه: ۱۴۴۷/۰۱/۰۶ هـ ق
له پېښو سره د مبارزې آمادګۍ ملي اداره
