د اورلګېدو د مخنیوي لپاره د دايمي تخنیکي کمېټې نوبتي غونډه ترسره شوه
نن سهار یکشنبه د اورلګېدو د مخنیوي لپاره د دایمي تخنیکي کمیټې غونډه له پېښو سره د مبارزې آمادګي ملي ادارې د مالي او اداري عمومي رئیس او سرپرست د الحاج مولوي محمد علم عالمیار په مشرۍ د ماليې وزارت، د کورنیو چارو وزارت، د کابل ښاروالۍ، د نفت او ګاز تنظیم ادارې او د کمیټې نورو غړو په ګډون په سوداګریزو مرکزونو، هستوګنیزو سیمو او پمپ سټیشنونو کې د اورلګېدو د مخنیوي لپاره د تدابیرو نیولو په اړه جوړه شوه.
غونډه د قرآن کریم د څو مبارکو آیتونو په تلاوت پیل شوه.
په دې غونډه کې د کار پرمختګ، په سوداګریزو مرکزونو او پمپ سټیشنونو کې د اورلګېدو د مخنیوي لپاره د خوندیتوب معیارونو د پلي کولو او د سروې ټیمونو د کار بیا پیل په اړه بحث وشو.
په پای کې فیصله وشوه چې ټولې سکتوري ادارې به د اورلګېدو د مخنیوي په برخه کې د اوونۍ په ترڅ کې هره یکشنبه او سه شنبه په ورځو کې د پمپ سټیشنونو سروې پیل کړي او راپور به یې د ا.ا.ا د اقتصادي معاونیت عالي مقام ته وړاندې کړي.
نېټه:۱۴۴۶/۵/۲۹
له پېښو سره د مبارزې آمادګۍ ملي اداره
