له پېښو سره د مبارزې آمادګۍ ادارې او د ژغورنې نړیوالې کمېټې (IRC) ترمنځ د نه لکه یو څلوېښت زره نه سوه او نه څلویښت (۹۴۱,۹۴۹) امریکایي ډالرو په ارزښت د ګډو همکاریو تفاهم نامه لاسلیک شوه
نن ورځ یک شنبه له پېښو سره د مبارزې آمادګۍ ادارې لوی رئیس محترم الحاج ملا نورالدین ترابي د ژغورنې نړیوالې کمېټې د مرستېال او د پروګرامونو د مسؤل بوستان فهیم، د نړیوالو اړیکو د مسؤل احمد سید بیان او د بشري لاسرسي مدیر احمد احمدزي سره په خپل کاري دفتر کې وکتل.
ترابي صاحب د ژغورنې نړیوالې کمیټې پلاوي ته د ښه راغلاست ترڅنګ وویل چې خوښ یو چې نن یوه داسې تفاهم نامه لاسلیک کوو چې په هغه سره زموږ ولس ته نغدي مرستې رسول کېږي او د یادې مؤسسې د ټول کاري ټیم څخه یې مننه وکړه او غوښتنه یې وکړه چې خپلو مرستو ته دوام ورکړي ترڅو ولس مو د خدماتو څخه برخمن سي.
د ژغورنې نړیوالې کمیټې د پروګرامونو مسؤل بوستان فهیم له پیښو سره د مبارزې آمادګۍ ادارې د ټولو کارکونکو څخه مننه وکړه چي یاده اداره زموږ کارونه بې له ځنډه ترسره کوي او ترڅنګ یې وویل چې له پيښو سره د مبارزې آمادګۍ ادارې سره باید بیلابیل مؤسسې او نړیوال سازمانونه بېلابېلې مرستې وکړي.
د یادونې وړ ده یاده تفاهم نامه چې لاسلیک شوه له مخې به یې د بادغیس ولایت په مرکز قعله نو،آب کمري او مقر ولسوالیو کې په ټولیزه توګه ۳,۹۶۴ کورنیو ته نغدي مرستې ووېشل سي چې هرې کورنۍ ته به ۱۹۳ ډالر ورکړل شي.
نیټه: ۱۴۴۸/۱/۵هــ ق
له پیښو سره د مبارزې امادګۍ اداره
