د نورستان ولایت له پېښو سره د مبارزې آمادګۍ ریاست ۱۹۲ سېلاب ځپلو کورنیو ته غیرخوراکي مرستې ووېشلې
د نورستان ولایت له پېښو سره د مبارزې آمادګۍ ریاست د کډوالۍ نړیوال سازمان (IOM)، UNICEF، د ماشومانو د ملاتړ نړیوالې موسسې او د PUIMI موسسې په همکارۍ، د یاد ولایت د برګمتال ولسوالۍ په اوله ګل کلي د وروستیو سختو بارانونو او سېلابونو ۱۹۲ زیانمنو کورنیو ته غیرخوراکي مرستې ووېشلې.
په دې بهیر کې، له سروې او د مستحقو کورنیو د پېژندنې وروسته د IOM دفتر له لوري هرې کورنۍ ته یوه باب خیمه، ۳ تختې کمپلې، د حفظ الصحي یوه بسته، کوچني سولري څراغونه، د UNICEF له لوري هرې کورنۍ ته غیرخوراکي توکو لرونکو یوه بسته، د پخلنځي یوه بسته، د ماشومانو د ملاتړ نړیوالې موسسې له لوري هرې کورنۍ ته د کور جوړولو وسایل او د PUIMI موسسې له لوري هرې کورنۍ ته د اړتیا وړ توکو لرونکې یوه بسته ووېشل شوه.
د مرستو ترلاسه کوونکو کورنیو له پېښو سره د مبارزې آمادګۍ ریاست او همکارو موسسو څخه د هغوی لومړنیو اړتیاوو ته د رسېدنې په پار مننه او قدرداني وکړه.
