د ننګرهار ولایت له پېښو سره د مبارزې آمادګۍ ریاست د حرفوي زده کړو ۸۰ تنه زده کوونکو ته نغدې پیسې ووېشلې
له پېښو سره د مبارزې آمادګۍ ملي ادارې او د AYSO موسسې تر منځ د لاسلیک شوي هوکړه لیک له مخې، د ننګرهار ولایت له پېښو سره د مبارزې آمادګۍ ریاست د یادې موسسې په مالي ملاتړ، د دې ولایت په سره رود ولسوالۍ کې هغو ۸۰ تنه نارینه او ښځینه زده کوونکو ته نغدې پیسې ووېشلې، چې د موبایل جوړولو، د سولر سیستم د ترمیم او نصب، سلمې دوزۍ او قالین بافۍ په برخه کې یې حرفوي زده کړې بشپړې کړې.
په دې لړۍ کې هر زده کوونکي ته ۷,۱۴۰ افغانۍ نغدې پيسې ورکړل شوې، چې ټولټال ۵۷۱,۲۰۰ افغانۍ نغدې پیسې د هغوی لپاره ځانګړې شوې وې.
د سیمې خلکو او ګډونوالو د AYSO موسسې او له پېښو سره د مبارزې آمادګۍ ریاست د دې اقدام هرکلی وکړ او څرګنده یې کړه چې دا ډول پروګرامونه به د هغوی د اقتصادي ودې او ځانبساینې په برخه کې رغنده رول ولوبوي.
نېټه: ۱۴۴۷/۵/۱۰ هـ ق
له پېښو سره د مبارزې آمادګۍ ملي اداره
