د سمنګان ولایت له پېښو سره د مبارزې آمادګۍ ریاست ۳,۰۱۲ زلزله ځپلو کورنیو ته نغدې، خوراکي او غیرخوراکي مرستې ووېشلې

د سمنګان ولایت له پېښو سره د مبارزې آمادګۍ ریاست، د متحده عربي اماراتو هېواد، د خوړو نړیوال پروګرام (WFP)، OHW او د ASIO مؤسسې په مالي همکارۍ، د یاد ولایت په دره صوف بالا او حضرت سلطان ولسوالیو او مرکز ایبک ښار کې د تېرې زلزلې له امله ۳,۰۱۲ زیانمنو کورنیو ته له سروې وروسته نغدې، خوراکي او غیرخوراکي مرستې ووېشلې.

په دې لړۍ کې هرې کورنۍ ته د مسؤلینو په شتون کې، د متحده عربي اماراتو له لوري، په ایبک ښار کې ۶۶۳ کورنیو هرې یوې ته یو کارټن خوراکي توکي، یوه تخته کمپله او ۱۸۸ کورنیو هرې یوې ته یو باب خیمه، یو کارټن خوراکي توکي او په دره صوف بالا ولسوالۍ کې ۲۶ کورنیو هرې یوې ته د WFP له لوري ۱۰۰ کیلو اوړه، ۹.۱ کیلو غوړي، ۱۲.۵ کیلو دال، ۱ کیلو مالګه، ۲.۱ کیلو بسکېټ، ۱.۵ کیلو پلمپي، ۳ کیلو سوپر سریال ووېشل شول. سربېره پر دې، د ASIO موسسې له لوري ۱,۷۷۱ کورنیو هرې یوې ته ۵,۸۰۰ افغانۍ او د OHW موسسې له لوري ۱۶۰ کورنیو هرې یوې ته ۱۳,۲۷۰ افغانۍ او یو روغتیایي کېټ او ۱۶۳ کورنیو هرې یوې ته ۱۱,۲۷۹ افغانۍ او ۶۷ کورنیو هرې یوې ته یو روغتیایي کېټ ووېشل شو، چې د وېشل شویو نغدو مرستو اندازه ټولټال څوارلس میلیونه او دوه سوه درې دېرش زره او څلور سوه اووه اویا (۱۴,۲۳۳,۴۷۷) افغانۍ کېږي. 

نېټه:۱۴۴۷/۷/۲ هـ ق

له پېښو سره د مبارزې آمادګۍ ملي اداره