د بغلان ولایت د خنجان ولسوالۍ د والیانو درې د عمومي سړک د بیارغونې کار پیل شو
د بغلان ولایت له پېښو سره د مبارزې آمادګۍ ریاست، د خنجان ولسوالۍ د والیانو درې د عمومي سړک د بیارغونې کار، چې د وروستیو سېلابونو له امله زیانمن شوی و، په بېړني ډول پیل کړ.
یاده پروژه د سیمې د اوسېدونکو لپاره د خوندي تګ راتګ د برابرولو او د خلکو ستونزو ته د پر وخت رسېدنې په موخه عملي کېږي. د یادونې وړ ده چې شاوخوا له ۳۰۰۰ څخه تر ۳۵۰۰ کورنۍ له دې لارې د خپلې اصلي مواصلاتي لارې په توګه ګټه اخلي.
د بغلان ولایت له پېښو سره د مبارزې آمادګۍ رئیس، مولوي هدایتالله همدرد، د یادې پروژې له روانو چارو څخه لیدنه وکړه او د بیارغونې د چارو پر چټکتیا یې ټینګار وکړ. نوموړي ډاډ څرګند کړ چې د افغانستان اسلامي امارت مسئولین به په هر ډول شرایطو کې د خلکو ترڅنګ ولاړ وي او د هغوی د ستونزو د حل لپاره به خپلې هڅې دوامداره وساتي.
د سیمې اوسېدونکو هم له پېښو سره د مبارزې آمادګۍ ریاست د پر وخت اقدام ستاینه وکړه او د دې مهمې مواصلاتي لارې د بیارغونې د چارو له پیل څخه یې خوښي څرګنده کړه.
