په افغانستان کې د ملګرو ملتونو دفترونه؛ ۹۶۵ زره کسانو ته به بشري مرستې وویشل شي

کابل- د مرغومي ۲۷مه-۱۴۰۱
په هېواد کې د سختې یخنۍ له امله احتمالي زیانمنو ته د رسېدنې لپاره بېړنۍ غونډه نن ورځ د الحاج ملا محمد عباس آخند په مشرۍ په افغانستان کې د ملګرو ملتونو د دفترونو او د پېښو په برخه کې د همکارو موسسو د مسوولینو په حضور کې ترسره شوه. 
په دې غونډه کې پېښو ته د رسېدو په چارو کې د دولت وزیر د ملي او نړیوالو موسسو او په افغانستان کې د ملګرو ملتونو د دفترونو له بشري مرستو څخه د مننې ترڅنګ وویل: د ورښتونو، واورو او سړې هوا له امله تر اوسه ۲۶ کسان شهیدان او ۷۰ زره څاروي لمنځه تللي دي، نو پکار ده چې د لا زیاتو انساني او څارویو د زیانونو د مخنیوي لپاره بشري مرستې ترسره شي.
نوموړي ووېل چې د ژمي له پيل څخه تر اوسه د موسسو په همکارۍ څه باندې ٥٠٠ زره کسانو ته بشري مرستې وېشل شوې دي او زياته يې کړه، چې د سړې هوا له امله احتمالي پېښو ته د رسېدنې په موخه ١٥ قلمه خوراکي او غير خوراکي توکي به د هېواد ۱۳ ولایتونو ته ولېږدول شي.
الحاج ملا محمد عباس اخند، د پامیریانو د ستونزو او ننګونو په اړه خبرې وکړې او د پامیریانو د کورونو، ښوونځیو، روغتونونو او نورو ستونزو د هواري په برخه کې یې د ملګرو ملتونو دفترونو او موسسو د همکارۍ غوښتنه وکړه.
هغه په هېواد کې په راتلوونکو ورځو کې د هوا د لاسړېدو څخه د يادونې ترڅنګ وويل: د بشري مرستو د دوام او د مرستو د رسولو د بهير د چټکتيا او د مرستو د ښه مديريت او د مرستو په رسولو کې د روڼتيا د رامنځته کېدو په موخه يې د دغه وزارت او ملي او نړیوالو موسسو ترمنځ پر همغږي یې ټینګار وکړ.
دغه راز د UN-OCHA دفتر استازي وویل: د ملګرو ملتونو دفترونه په پام کې لري ترڅو ۹۶۵ زره کسانو ته بشري مرستې ووېشي او د بشري مرستو د دوام ژمنه یې وکړه. 
ورپسې د IOM، DRC او UNHCR دفترونو استازو د خپلو فعالیتونو په اړه خبرې وکړې او ویې ویل چې ۱۳۰ زره کورنیو سره بشري مرستې شوي دي او ژمنه یې وکړه چې خپلو مرستو ته به دوام ورکړي.
د خوړو نړیوال سازمان او د هستوګنې لپاره د آقا خان دفتر د خپلو فعالیتونو او دندو په اړه خبرې وکړې او د همکاریو پر دوام یې ټینګار وکړ.
د غونډې په پاۍ کې د پامیریانو د مشکلاتو هوارېدو، د هوا سړېدو له امله زیانمنو ته په وخت رسېدنه او د پېښو وزارت او ملي او نړیوالو موسسو ترمنځ پر همغږي باندې ټینګار وشو.