له پېښو سره د مبارزې آمادګۍ ملي ادارې سرپرست ګیزاب ولسوالۍ ته سفر وکړ؛ د غره ښویېدنې له امله د شهیدانو ورثه نغدي مرستې ترلاسه کړې
نن سهار (دوشنبه)، له پېښو سره د مبارزې آمادګۍملي ادارې سرپرست الحاج ملا نورالدین ترابي، د بیړنیو حالاتو د رئیس, قاري محمد خوشحال زماني، او د ورسره پلاوي په ملتیا، د وروستیو سېلابونو او د غره ښویېدنې له امله زیانمنو شویو کورنیو سره د غمشریکۍ, خواخوږۍ او هغوی ته د مرستو رسولو په موخه د ارزګان ولایت ګیزاب ولسوالۍ ته سفر وکړ.
په دې سفر کې، ترابي صاحب د ګیزاب ولسوال، ملا آمر حمزه حنفي، د سیمې مشرانو او زیانمنو کورنیو سره وکتل او د افغانستان اسلامي امارت د مشرتابه د تسلیت پیغام یې هغوی ته ورساوه او د پېښې د شهیدانو لپاره یې دعا وکړه. همداراز د 7 شهیدانو ورثه ته یې نغدي مرستې وویشلې.
ترابي صاحب د سیمې له خلکو قدرداني وکړه چې د جانبي مرستو د نه شتون سره سره توانېدلي، چې ټپیان او د شهیدانو جسدونه د نړېدلي کور له ویجاړیو راوباسي. نوموړي ټینګار وکړ چې اسلامي امارت تل د خپل ولس خدمت ته چمتو دی، او له خلکو یې وغوښتل چې د سېلاب په لارو او د ځمکې ښویېدنې په سیمو کې د کورونو له جوړولو ډډه وکړي.
ورته مهال, د سیمې خلکو د افغانستان اسلامي امارت، په ځانګړې توګه د الحاج ملا نورالدین ترابي له هڅو مننه وکړه، او غوښتنه یې وکړه چې د دې پېښې له زیانمنو شویو سره دې لا ډېرې مرستې وشي.
د یادونې وړ ده, چې له پېښو سره د مبارزې آمادګۍملي ادارې سرپرست د هر شهید ورثه ته ۱۰۰,۰۰۰ افغانۍ (ټولټال د ۷ شهیدانو ورثه ته ۷۰۰,۰۰۰ افغانۍ) نغدي مرستې ووېشلې او د ګیزاب ولسوال د یادو شهیدانو کورنیو ته ۵۰,۰۰۰ افغانۍ مرستې ووېشلې.
نیټه: ۱۴۴۶/۹/۰۳
له پېښو سره د مبارزې آمادګۍ ملي اداره
