له پېښو سره د مبارزې آمادګۍ ملي ادارې او د هیلو ټرسټ نړیوالې موسسې د ګډو همکاريو هوکړه لیکونه لاسلیک کړل 

نن سهار له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي او د هیلو ټرسټ نړیوالې موسسې مسؤل ډاکټر فرید احمد همایون ترمنځ د ګډو همکاريو درې مهم هوکړه لیکونه لاسلیک شول. 
محترم الحاج نورالدین ترابي د هیلو ټرسټ موسسې پلاوي ته په ښه راغلاست سره زیاته کړه چې، موږ موسسو ته بلنه ورکوو، هغوی هڅوو او آسانتیاوې ورته برابروو او په هر ولایت کې چې هغوی خپلې پروژې پلي کوي، له هغوی ملاتړ کوو او د هغوی هوکړه لیکونه په مناسب وخت کې لاسلیک کوو. 
له هغه وروسته د هیلو ټرسټ موسسې مسؤل ډاکټر فرید احمد همایون په مناسب وخت کې د هغوی د کارونو ترسره کولو په پار له ترابي صاحب څخه مننه وکړه او خوښۍ یې څرګنده کړه چې د پخوا په پرتله زموږ کارونه چټک شوې دي. 
لومړۍ هوکړه لیک په هلمند ولایت کې ۱،۳۳۳،۳۱ متر مربع په ماینونو او ناچاوده توکو ککړې ځمکې پاکولو، د ماینونو او ناچاوده توکو خطرونو په اړه ۷۵۹ پوهاوي ورکشاپونو ترسره کولو، د بشري امنیت او د ژوند زمینې برابرولو په برخه کې د ۱،۴۲۵،۰۰۰ (۱ میلیون ۴۲۵ زره) امریکایي ډالرو په ارزښت پلي کېږي. 
دویم هوکړه لیک په میدان وردګ، غزني، خوست، کندهار، زابل، ارزګان، هلمند، هرات، فراه، غور، فاریاب، بلخ، ننګرهار، کونړ او نورستان ولایتونو کې د ۱۰ میلیون متر مربع تر ګواښ لاندې سیمو د پاکولو په برخه کې د ۹،۶۸۴،۰۰۰ (۹ میلیونه، ۶۸۴ زره) امریکایي ډالرو په ارزښت پلي کېږي. 
درېیم هوکړه لیک په ۳۴ ولایاتو کې د ۷۵ ټنه ناچاوده توکو له منځه وړلو، د ماینونو خطرونو په اړه د ۳۲۰ ورکشاپونو ترسره کولو چې ۶۸۹۰ نارینه، ښځې او ماشومان په مستقیم ډول ترینه ګټه اخلي، د ۱،۱۲۵،۰۰۰ (۱ میلیون او ۱۲۵ زره) امریکایي ډالرو په ارزښت پلي کېږي. 

نېټه: ۶/۴/۱۴۴۶
له پېښو سره د مبارزې آمادګۍ ملي اداره