له پېښو سره د مبارزې آمادګۍ ملي ادارې او د خوړو نړیوال سازمان (WFP) ترمنځ د ګډو همکاریو په اړه څلورمه تخنیکي غونډه ترسره شوه
نن سهار پنجشنبه، له پېښو سره د مبارزې آمادګۍ ملي ادارې او د خوړو نړیوال سازمان (WFP) ترمنځ د ګډو همکاریو په اړه څلورمه تخنیکي غونډه، د اطلاعاتو او عامه اړیکو رئیس، حافظ محمد یوسف حماد، د پلان او پالیسۍ رئیس، ملا محمد جاوید عباس، د نړیوالو اړیکو ریاست سرپرست، برهانالدین خان، د ماین پاکۍ د همغږۍ او انسجام رئیس قاري نورالدین رستم خېل، د خوړو نړیوال پروګرام د اړیکو مسؤل، اون شیورت، د بیړنیو چارو مسؤل، منصفالله انوري او د دې ادارې د یو شمېر آمرینو په شتون کې ترسره شوه.
په دې ناسته کې، له پېښو سره د مبارزې آمادګۍ ملي ادارې استازو د دې ادارې د پلانونو، د بیړنیو حالاتو پر مهال د عملیاتي پروګرامونو، د بشرپالنې مرستو په ویش کې همغږۍ، وچکالۍ، د ظرفیت لوړولو، وقایوي پروژو او نورو تخنیکي موضوعاتو په اړه بحث وکړ او د برنامو د پلي کېدو په برخه کې د لا زیاتې همکارۍ او همغږۍ پر اړتیا یې ټینګار وکړ.
ورپسې، د خوړو نړیوال سازمان استازو د یاد سازمان د ژمنې یادونه وکړه، چې د زیانمنو شویو کورنیو سره د مرستو د چټکتیا او د ښه خدمتونو وړاندې کولو لپاره ګډ کار ته ژمن دي. هغوی ژمنه وکړه چې د بېړنیو حالاتو پر مهال په عملیاتي برخو، وقایوي پروژو او ظرفیت لوړولو په برخه کې به همکاري وکړي.
په پای کې، دواړو خواوو د ګډو همکاریو د لا پیاوړتیا، د فعالیتونو په ترسره کولو کې د همغږۍ زیاتوالي او د طبیعي پېښو او د کاري سیمو په اړه د معلوماتو د تبادلې پر اړتیا ټینګار وکړ.
نېټه:۱۴۴۶/۹/۲۷
له پېښو سره د مبارزې آمادګۍ ملي اداره
