د ننګرهار ولایت له پېښو سره د مبارزې آمادګۍ ریاست ۳۰۰ سېلاب ځپلو کورنیو ته د غیرخوراکي توکو مرستې ووېشلې
د ننګرهار ولایت له پېښو سره د مبارزې آمادګۍ ریاست د کډوالۍ د نړیوال سازمان (IOM) او (PUMI) دفتر په ملاتړ، د یاد ولایت په خوګیاڼو ولسوالۍ کې د وروستیو شدیدو سېلابونو له امله ۳۰۰ زیانمنو کورنیو ته له سروې وروسته د غیر خوراکي توکو مرستې ووېشلې.
په دې لړۍ کې د مسؤلینو په شتون کې د (IOM) له لوري هرې کورنۍ ته یو عدد سولري څراغ، یو د پخلنځي کیټ، ۳ تختې کمپلې او ۶۹ کورنیو ته چې ډېرې زیانمنې شوې وې هرې یوې ته په پورتنیو مرستو سربېره یو باب خېمه او د (PUMI) دفتر لخوا هرې کورنۍ ته د روغتیا ساتنې کېټونه ووېشل شول.
په پای کې، د مرستو ترلاسه کوونکو کورنیو د یادو مرستو له ترلاسه کولو وروسته خوښي څرګنده کړه او د دوی ستونزو ته د رسېدنې له امله یې له اړوندو مسؤلینو څخه مننه وکړه او همداراز د لا زیاتو او دوامدارو مرستو غوښتونکي شول.
د یادونې وړ ده، چې د یاد ولایت له پېښو سره د مبارزې آمادګۍ ریاست ډاډ ورکوي چې د زیانمنو کورنیو ملاتړ به دوام ولري او هڅه به کوي چې اړمنو کورنیو ته به لا زیاتې آسانتیاوې برابره وي.
نېټه: ۱۴۴۷/۱۱/۱ هـ ق
له پېښو سره د مبارزې آمادګۍ ملي اداره
