له پېښو سره د مبارزې آمادګۍ ملي ادارې سرپرست د کابل د ده سبز ولسوالۍ د پرون ورځې سیلاب ځپلو سیمو څخه لیدنه وکړه
نن ماسپښین د دوشنبې په ورځ، محترم الحاج ملا نورالدین ترابي، له پېښو سره د مبارزې آمادګۍ ملي ادارې سرپرست، د کابل ولایت د ده سبز ولسوالۍ له د پرون دسیلاب ځپلو سیمو څخه لیدنه وکړه.
په دې لیدنه کې، د ادارې سرپرست د سختو بارانونو او وروستیو سېلابونو د زیانمنو سیمو وضعیت له نږدې وڅېړې او د سیمې له اوسېدونکو سره یې لیدنه او خبرې اترې وکړې. نوموړي د دې لیدنې پر مهال د خلکو ستونزو، ننګونو، غوښتنو او وړاندیزونو ته په دقت غوږ ونیوه او ټینګار یې وکړ چې د زیانمنو شویو کسانو وضعیت ته رسیدګي له پېښو سره د مبارزې آمادګۍ ملي ادارې له لومړیتوبونو څخه دی.
محترم ترابي صاحب د هغو کورنیو سره خواخوږي څرګنده کړه چې په دې طبیعي پېښه کې زیانمنې شوې دي او ډاډ یې ورکړ چې ژر به د اړوندو ادارو او همکارو موسسو په همغږۍ سره، بیړنۍ مرستې زیانمنو کسانو ته ووېشل شي.
نوموړي همدارنګه د ادارې تخنیکي ټیمونو ته لارښوونه وکړه چې د سروې بهیر د ځواب ویلو سره یوځای چټک کړي.
له پېښو سره د مبارزې آمادګۍ ملي اداره له ټولو دولتي ادارو، خیریه موسسو او نړیوالو بنسټونو غواړي چې د ده سبز ولسوالۍ د زیانمنو شویو کسانو بیړنیو اړتیاوو ته د رسیدګي په موخه هر اړخیزه همکاري وکړي.
نیټه: ۱۴۴۷/۱/۱۸ هـ ق
له پېښو سره د مبارزې آمادګۍ ملي اداره
