له پېښو سره د مبارزې آمادګۍ ملي ادارې او د ښځو د هوساینې او پرمختګ موسسې ترمنځ ټولټال د نولس زره او څلور سوه یو شپېته (۱۹,۴۶۱) ډالرو په ارزښت د ګډو همکاریو تفاهمنامه لاسلیک شوه
نن ماسپښين د چهارشنبې په ورځ، له پېښو سره د مبارزې آمادګۍ ملي ادارې د مالي او اداري عمومي رئیس، محترم الحاج مولوي محمد علم عالميار، د ښځو د هوساینې او پرمختګ د مؤسسې له رئیس، محترم انجنیر عزت الله لطيفي سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
محترم عالميار صاحب د دې ترڅنګ چې د موجوده تفاهمنامې په اړه یې معلومات ترلاسه کړل او ویې وېل، چې د افغانستان خلک مرستې ته اړتیا لري او لازمه ده چې هره اداره تر خپل توان پورې د خلکو د ستونزو د هوارولو لپاره هڅې وکړي.
په همدې حال کې، د ښځو د هوساینې او پرمختګ مؤسسې رئیس، محترم انجنیر عزت الله لطیفي، د ادارې د مشرتابه له خوا د مرستندویه موسسو سره د همکارۍ له امله مننه وکړه او ژمنه یې وکړه چې روانه پروژه به په شفافیت او چټکتیا سره پلي کړي.
د یادونې وړ ده، چې په پای کې د دواړو لوریو ترمنځ د نولس زره او څلور سوه یو شپېته (۱۹,۴۶۱) ډالرو په ارزښت د ګډو همکاریو تفاهمنامه لاسلیک شوه، چې له مخې به یې یاده موسسه د کډوالۍ نړیوال سازمان په ملاتړ، د پېښې د رامنځته کېدو په صورت کې له سروې وروسته، په پنجشیر ولایت کې ۱۴۴ کورنیو او په غور ولایت کې ۵۴ کورنیو ته خوراکي مرستې ووېشي. په دې مرستو کې به هرې کورنۍ ته ۱۰۰ کیلو اوړه، ۹.۱ کیلو غوړي، ۱۳.۱ کیلو دال او یو کیلو مالګه وېشل سي.
نېټه: ۱۲/۲/۱۴۴۷ هـ ق
له پېښو سره د مبارزې آمادګۍ ملي اداره
