د پېښو چارو د انسجام معین په کاپیسا کې د هغو ۱۲ ډبرو د ویجاړولو له بهیر څخه چې د ښویېدو امکان یې شتون درلود څارنه وکړه
له پېښو سره د مبارزې آمادګۍ ادارې د پېښو چارو د انسجام معین، محترم الحاج ملا عبدالولي څارنوال (حاجي وارث)، د خطر د مخنیوي او کمولو له رئیس, محترم الحاج مولوي اختر محمد خادم او یو تخنیکي او مسلکي ټیم سره یوځای کاپیسا ولایت ته سفر وکړ او د ولایت د مرکز اړوند د الیاسخېل په کلي کې یې د هغو ۱۲ ډبرو او د دوو خاورینو غونډیو د بدنې د ویجاړولو له بهیر څخه, چې د ښویېدو امکان یې شتون درلود, څارنه وکړه.
د دغو ډبرو د ویجاړولو چارې د خیر په دعا سره پیل شوې او د پېښو چارو د انسجام معین د کار په جریان کې پر دقت، چټکتیا او لازم احتیاط ټینګار وکړ او اړوندو مسوولینو ته یې لازمې سپارښتنې وکړې.
همداراز، د خطر د مخنیوي او کمولو رئیس, د یادې پروژې په اړه معلومات وړاندې کړل او ویې ویل چې د دغو ډبرو ترڅنګ به د غرونو هغه برخې او نورې ډبرې چې د ځایي خلکو ژوند ګواښي، تر ارزونې وروسته په خوندي ډول ویجاړې شي.
په همدې حال کې، د کاپیسا ولایت له پېښو سره د مبارزې آمادګۍ رئیس، مولوي محمد صابر احمد، وویل چې په دې کلي کې له ۷۰۰ کورنیو څخه شاوخوا ۸۰ تر ۹۰ کورونه د دغو ډبرو تر ګواښ لاندې وو، چې اوس د هغوی د خوندي کولو بهیر په چټکۍ سره روان دی.
د یادونې وړ ده چې دا ۱۲ ډبرې په ټولیز ډول د ۱۳۰ متر مکعب حجم لري او د دوو خاورینو غونډیو بدنه په ټولیز ډول ۱۴۶ متر مکعب حجم لري چې د یو لک (۱۰۰,۰۰۰) افغانیو په لګښت قرارداد شوې دي. همداراز، ۶ نورې ډبرې او یوه خاورینه غونډۍ چې ټولیز حجم یې ۴۵۹.۸۲ متر مکعب دی، تازه سروې شوې دي او د یو لک او نه دېرش زره (۱۳۹,۳۲۵) افغانیو په لګښت قرارداد شوې دي، چې کار به یې له نن ورځ ۱۴۴۷/۱۱/۱۱ نېټې څخه وروسته په یوه میاشت کې بشپړ شي.
په همدې حال کې، د سیمې اوسېدونکو دغه اقدام وستایه او له پېښو سره د مبارزې آماړګۍ ادارې څخه یې مننه وکړه او د اسلامي امارت د مسوولینو لپاره یې د خیر دعاوې وکړې.
نېټه: ۱۴۴۷/۱۱/۱۲ هـ ق
له پېښو سره د مبارزې آمادګۍ اداره
