په پنجشېر ولایت کې د سیلابي لارو او کرنیزو کانالونو د پاکولو پروژه پرانیستل شوه
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ، د پنجشېر ولایت له پېښو سره د مبارزې آمادګۍ ریاست د شتل ولسوالۍ څخه د سیلابي لارو، کرنیزو کانالونو او د زیانمنو شویو سړکونو پاکولو د پروژې کار پیل کړ. دا پروګرام به په څو پړاوونو کې د پنجشېر ولایت په ټولو ولسوالیو کې پلي شي.
د دې پروژې د پلي کېدو په موخه، له پېښو سره د مبارزې آمادګۍ ادارې له لوري درې عرادې JCB اسکواټور ماشینونه پنجشېر ولایت ته لېږل شوي دي. دغه ماشینونه به د پنجشېر ولایت له پېښو سره د مبارزې آمادګۍ ریاست په همغږۍ، د وروستیو بارانونو او سیلابونو له امله رامنځته شوې خټې، شګې، ډبرې او نور رسوبات له سیلابي لارو، کرنیزو کانالونو او زیانمنو شویو سړکونو څخه پاک کړي. همدارنګه، د اړینو تخنیکي اقداماتو په ترسره کولو سره به د اوبو د قدرتي جریان لاره بېرته ورغول شي او د راتلونکو احتمالي سیلابونو د خطرونو د کمولو زمینه به برابره شي.
د دې پروژې په بشپړېدو سره به د سیلابي لارو د بندېدو خطر د پام وړ راکم شي، د ولسوالیو مواصلاتي لارې به خوندي شي او د سیمې د اوسېدونکو تګ راتګ به په لا اسانه توګه ترسره شي. سربېره پر دې، د سیلابي لارو په شاوخوا کې کرنیزې ځمکې، عامه المنفعه تأسیسات او د خلکو استوګنیز کورونه به د احتمالي سیلابونو له خطرونو او زیانونو څخه خوندي پاتې شي.
د شتل ولسوالۍ اوسېدونکو د دې پروژې له پیل څخه هرکلی وکړ او له پېښو سره د مبارزې آمادګۍ ادارې او د پنجشېر ولایت له پېښو سره د مبارزې آمادګۍ ریاست له پاملرنې او همکاریو څخه یې مننه وکړه. هغوی د دې پروګرام پلي کېدل د قدرتي پېښو د خطرونو په کمولو او د خلکو د ځان او مال په ساتنه کې یو اغېزناک ګام وباله.
